Eirûknaa mawhphurtu ber chu politician-te kan ni - Duhoma

ZPM leader Lalduh­oma chuan, Mizoramin a chhiatpui ber chu eirûkna (corruption) a nih thu leh eirûknaa mawhphurtu ber chu politician-te an nih thu a sawi.

Lalduhoma hian April 11, Thawhlehni zan khan Sesawng khaw­laia vantlang inkhawm­ah thu sawiin, "Kan ramin a chhiatpui ber chu eirûkna a ni a, he thila a mawhphurtu ber chu politician-te kan ni. Mipui thlan tlin roreltute'n ram leh hnam hmasawnna aia eirûkna leh hlemhlêtna an ngaih pawimawh zawk chhung chuan sorkar hnathawkte leh mipui mimir chuan dikna leh rinawmna kan hnualsuat ṭhin a ni," a ti.

Mizoram dinhmun leh tuna inrêlbàwl dan chu Pathian mal-sawm tlâkin a awm ta lo nia a lan thu sawiin Lalduhoma chuan, "Politics hi ram rawngbawlna pawimawh tak a ni a, khelh dik aiin khelh fuh kan tum a, hei hian kan moral a ṭha lo zawngin a hruai nasa em em a ni," a ti a; ZPM chuan Mizoram politics-ah Pathian ram a thlen chu an ngaih pawimawh ber a nih thu a sawi.

ZPM Leader chuan, hmun tinah ZPM an ṭhang zel nia sawiin, "Kan tih a ni lo a, thawktu a awm a, chung lamin min pui a ni tih hi hmuh theih, hriat theihin kan chiang a ni. Kan sorkar ngei ang kan ti thei lo, Pathian thu thu a ni a, mahse, inthlan hi kan nghakhlel hle a ni," a ti.

Inkhawm hi ZPM, Sesawng group president R Lalhma­chhuana'n a kaihruai a, AMC corpo­­rator Baryl Vanneihsangi Tlau pawhin thu a sawi. ZPM party zawm thar eng emaw zat an lawm lut niin ZPM thuchhuah chuan a tarlang.