DoNER Minister hoin hnathawhte thlirho

Ministry of Develop­ment of North Eastern Region (DoNER) minister of state BL Verma hoin nimin khan Chief Minister's Office conference hall-ah sorkar hotute'n Mizorama DoNER ministry hnathawhte an thlirho. Chief minister Zoramthanga chuan, Mizorama DoNER hnuaia hmalaknate ṭha taka tihhlawhtlin vek a nih tur thu a sawi.

CM Zoramthanga chuan, Mizorama DoNER ministry hnuaia hmalakna hrang hrangte chu ṭha taka tih­hlawhtlin vek a nih tur thu sawiin, "North East Road Sector Deve­lopment Scheme (NERSDS) hnuaia Mizoramin project pali a neih zinga pathum chu Mizoram PWD-in an thawk a, Border Roads Organisation (BRO)-in project pakhat an chan hi tun thlengin bul an la ṭan theih loh avangin hmasawnna a khawtlai thei dawn," a ti a; BRO chan project chu Mizoram PWD kuta hlân chhâwng turin DoNER Minister hnenah a rawt.

Ṭhutkhawmah hian Planning Board vice chairman H Rammawi, Finance secretary Vanlalchhuanga, secretary to CM K Lalthawmmawia bakah, DoNER hnuaia project khawihtu department aiawhte an tel.

Sorkar thuchhuah tarlan danin, Mizoramah DoNER ministry project 76 kalpui mek a ni.

DoNER minister BL Verma leh CM Zoramthanga te hi nimin zing khan a hranpain an inkâwm bawk a, tûkṭhuan an kîl dun a ni.