KHAWTHLIR

Chawlh puang

Governor Dr Hari Babu Kambhampati chuan The Negotiable Instruments Act, 1881 Section 25 tlawhchhanin Dr BR Ambedkar pian champha, April 14, Zirtawpni chu sorkar chawlhah a puang.

Thisen pe

Mizoram College of Nursing-a B.Sc. Nursing third year zirlai-te chuan Evangelical Nurses Fellowship Day pualin nimin khan ZMC blood bank-ah thisen unit 19 an pe a, petute hmeichhia 18 leh mipa pakhat an ni.

FTS convocation

Environment, Forests & Climate Change department hnuaia Forest Training School, Bethlehem Vengthlang chuan nimin khan an conference hall-ah Convocation vawi 23-na an hmang a, principal chief conservator of forests RK Singh-a'n hmanpuiin, forest guard zir zo mi 18 leh forester zir zo mi 13 hnenah certificate a hlan. Forest Training School hi November 1974-ah din a ni a, mi 305-in forester leh mi 643-in forest guard an zir chhuak tawh a ni.

Bituk zat khûm

Geology & Mining department chuan kum 2022-23 chhunga Mizoram sorkarah chhiah (non-tax revenue) Rs 12,24,46,479 an chhûng lut a, an chhûn luh tura bituk (target) Rs 10,80,00,000 chu Rs 1,44,46,479-in an khûm a ni.

Meth man

Champhai Khankawn checkgate-a police duty-te chuan nimin khan i10 car pakhat aṭangin methamphetamine kg. 2.26 a rit (mûm 20,000) an man a, international market-ah cheng nuai 679 hû a ni. Meth hi mi pali - Lallawmawma (32) s/o Vanlalrema, Venghnuai, Aizawl (car khalhtu), Joseph Lalhmangaihsanga (28) s/o Simon Zoduhsanga, Chawnpui, Aizawl, Jimia (28) s/o Lalnunzira, New Eden, Mamit district leh Bikrom Das (26) s/o Nikhil Das, Rajput Talkar Grant, Cachar, Assam nia inchhálte hnen aṭangin man a ni a, meth hi car bumper chhunga an thuhrûk hmuh chhuah a ni.