Chakai Demonstration Farm chungchangah ICAR-in mumal takin information an dawng lo

MJA, Lunglei District member-te chuan nimin khan Kolasib leh a chhehvela sorkar hmalaknate tlawhin an zir a; Kolasib Dumluia Chakai Demonstration Farm chu Indian Council of Agricultural Research (ICAR) mithiamte enpuina anga sawi awm chungchangah mumal takin ICAR-in information an dawng lo tih sawi lan a ni.

Lunglei MJA member-te hian sorkar laipui enkawl ICAR an tlawh a, ICAR Research Complex for NEH Region head of regional centre Dr S Doley-a'n lo dawngsawngin an hmalaknate a hrilhfiah a; ICAR Research Complex for NEH Region-ah hian scientist panga an awm mek.

Chakai Demonstration Farm, Kolasib Dumlui chu ICAR mithiamte enpuina anga sawi awm chungchang chanchinbumite zawhna chhangin ICAR scientist PL Lalrinsanga, aquaculture (fishery science) chuan, mumal takin ICAR-in information an dawn loh thu leh zirchianna awm loa farm anga chakai kalpui chu a tih chi a rin loh thu a lo hrilh thu a sawi.

PL Lalrinsanga chuan, sorkarin chakai farm hmalakna a kalpui tâkah chuan a mimal angin chakai ei duh zawngte leh biology a zir thu sawiin, hmun hrang hranga chakai lâk khawma hmun khata dah chu a awm hmasate'n a awm hnuhnungte an beih ṭhin avangin dam chhuahna chance an neih tlem thu a sawi a; phai lamah chuan chakai farm an kalpui rêng rêng buh hmuna khawi chi a nih thu leh, tlang rama chakai ang chi chu khâwi chi a ni em tih zirchianna a la awm loh avangin a harsat a rin thu a sawi bawk.

Chanchinbumite hi ICAR hmunhma leh laboratory-te fanpui an ni a; an ngenna chhángin Dr S Doley chuan, financial year kal mek chhungin Lungleiah kut hnathawktute tan training an buatsaihsak ngei dawn thu a sawi.

Lunglei chanchinbumite hian Krishi Vigyan Kendra (KVK), Kolasib district pawh an tlawh nghal a, senior scientist & head Dr Michelle C Lallawmkimi hoin thawktute'n lo dawngsawngin, an hmalaknate an lo hrilhfiah.

Dr Michelle C Lallawmkimi chuan, KVK, Kolasib-ah Chief Minister leh Agriculture Minister hming la kawpa siam Zorin bean hlawhtling takin an enchhin thu leh loneitute pawhin an hlawhtlinpui thu a sawi a; Mizorama a hmasa ber turin arsa 'Kadakrath' an enchhin mek thu leh rainbow rooster, turkey leh guinea fowl-te pawh enchhinin an vulh mek thu a sawi bawk.

Lunglei MJA member-te hian Irrigation & Water Resources department-in Kolasib Tuichhuahena hma an lâk mekna an thlawh bawk.

Lunglei MJA member-te hi Kolasib district MJA member ṭhenkhatte'n an ṭawiawm a ni.