Central-in Mizoram tana sum a pek a nihna anga hman loh a awm ṭhin - MoS BL Verma

Development of North Eastern Region (DoNER) leh Cooperation ministry enkawltu minister of state BL Verma chuan, sorkar laipuiin sum tam tak Mizoram tan a pe a, mahse, a nih dan tura ang taka sum hman loh a awm ṭhin avangin mipuiin hmasawnna an hmuh tur ang an hmuh loh thu a sawi.

Zan khat riaka Mizorama rawn zin BL Verma hian April 11, Thawhlehni tlai khan BJP, Mizoram Pradesh pisa tlawhin, an party mite hmaah thu a sawi a, "State hrang hrangah Pu Modi kaihhruai sorkar laipuiin sum kan pe ṭhin a, Mizoram tan pawh Central-in sum tam tak kan pe. Mahse, a nihna tur anga sum hman a nih loh dan ka rawn hmu a, chutiangte avang chuan Mizorama thingtlang khaw tam takah leh khawpuiah ngei pawh hmasawnna kan hmuh tur ang kan hmu thei lo a ni tih Mizoram mipui ka hrilh duh a ni," a ti.

BL Verma chuan, "State leh Central-a BJP sorkarna hi hmasawnna thlen theih nan a pawimawh ber a nih avangin double engine sorkar hi Mizoramah kan mamawh ber leh miretheite'n leirem kan rah vena tura kawng pawimawh ber a ni," a ti a; hmasawnna tak tak a thlen theihna tur chuan BJP an sorkar a ngai niin a sawi.

Lengpui Airport chei ṭhat chungchang sawiin BL Verma chuan, "Sum kan pek vek tawh leh kum 2021-a zawh tur a nih tawh laiin, Covid-19 leng avangin zawh hun tura tih pawhsei a ni tawh a, tunah hian kum hnih chhung pawhsei min dil leh a, nimahsela, kei chuan October 2023 chhung ngeia zo turin ka ti thung," a ti.

Union Minister chuan, Mizorama MLA inthlanpui awm turah BJP-in sorkarna an chan ngei theih nan theihtawp an chhuah dawn tih sawiin, "Mizoram mipuite'n BJP ṭhatna vawiina tlêmte chauh kan hmuh hi kum 2023 MLA inthlan awm turah hian BJP kan thlang tling a nih chuan nasa takin BJP sorkar ṭhatna zár kan zo thei dawn a ni," a ti a; Narendra Modi kaihhruai sorkarin hmasawnna a ngaih pawimawh avangin Mizoram pawhin hmasawnna a taka a chan theih nan BJP sorkartir a ṭul thu a sawi.