Adult Education buatsaih thiam thil zirnaah mi 166 in an zir chhuak

School Education department hnuaia Adult Education-in eizawnna kawnga thiam thil zirna Ramhlun South leh Chawnpuia model centre-a an buatsaih chu zawh a ni a, mi 166 in an zir chhuak. Nimin khan School Education Directorate conference hall-ah khârna inkhawm buatsaih a ni a, School Education minister Lalchhandama Ralte-in a hmanpui.

School Education deputy director (Adult Education) Ng. Fanchun tarlan danin, Adult Education-in model centre hrang hrangah eizawnna kawnga thiam thil zirna an kalpui a, Aizawlah chuan Chawnpui leh Ramhlun South model centre-ah kalpui a ni. Lawngtlai leh Mamitahte pawh buatsaih a ni bawk.

Model centre-ahte hian eizawnna leh bank chhawr ṭangkaina tura hriat tur pawimawh te, pickle leh jam siam dan te, pangpar chìn leh khawi dan te, chhang ur te, lumeh te, hotel/restaurant-a thawh dan te, pheikhawk chhe siam leh nihliap chhe siamte a ni.

Ramhlun South centre-ah mi 34-in zirin, an vaiin a tawp thlengin an zir a, Chawnpui centre-ah hian mi 53-in zirin, mi 47-in an zir chhuak thung. Lawngtlai centre-ah mi 45-in zirin, mi 39-in an zir zo a, Mamit centre-ah mi 46 zirin, an zir tluan vek bawk. Centre pali-ah hian mi 178-in an zir a, chu'ng zinga mi 166 chuan an zir chhuak a ni.

Minister Lalchhandama Ralte chuan, Adult Education-in skill development lamah huang an zauh a, an hlawhtlinna a lang chu lawmawm a tih thu leh zau zawka hma an lak zel a beisei thu a sawi a; zir chhuakte chu an hlawhtlin leh hlawhtlin loh an kutah a awm dawn tih sawiin, teirei peih tur te, taimakna leh tumruhna neia hmathlir fel tak nei turin a chah.

Lalchhandama Ralte chuan, ram hmasawnte'n skill development lamah lian takin hma an la tih sawiin, Mizoram sorkar pawhin skill development-ah LESDE hmangin lian takin hma a la tih a sawi a, "Ram huap inelnaah training ṭha pawh nei mumal loin Mizo nula tlangval kan intir a, a ti ṭha pawlah an lang thei a, gold medal late pawh an awm. Tunah hian kum 2024-a World Skill Competition-a tel turin Mizo nula tlangval tirh tumin kan inbuatsaih mek a ni," a ti.

Education Minister chuan, New Education Policy 2020-ah skill development ngai pawimawh a ni tih sawiin, "Sikulah pawh thiamthil zir nan kum khatah ni 10 chhung chu school bag keng loa hun hman tum a ni a, hemi mil hian school calendar pawh siam a ni," a ti a; Pathianin Mizote theihna ṭha tak a pek chu chawi kàn zel a pawimawh thu a sawi.

Inkhawmah hian School Education secretary Dr Lalzirmawia Chhangte pawhin thu a sawi a; training-a zir chhuakte'n an thil siamte an pho chhuak nghal a ni.