SEDP sem dan tur ngaihtuah

Lunglei District Socio Economic Development Policy (SEDP) Committee chu nimin khan an chairman Ramdinliani, bawrhsap kaihhruaiin DC conference hall-ah an ṭhukhawm. Lunglei district-a MLA bial paruka chhungkaw 14,000 hnena SEDP Phase-II dawng tura thlante chu online hmanga kalpui tur a nih thu tarlan a ni.

Ramdinliani chuan, SEDP chu district chhunga kut hnathawktu tana eizawnna bul ṭanna tur leh eizawnna kalpui mekte'n hma an sawn zel nana ṭanpuina tur a nih thu a sawi a, "Mizorama mimal leh chhungkua a tam thei ang ber dinhmun ṭha zawka hlàn kai tum a ni," a ti a; SEDP dawng tawh leh dawng turte chu an hlawhtlin theih nan kaihruaia theihtawp chhuahpui turin line department hotute a chah.

Ṭhutkhawma tarlan danin, SEDP Phase-II hi Mizoram State e-Governance Society nen ṭangrualin online-a kalpui tum a ni a, Lunglei district-a MLA bial paruka SEDP dawng tura chhungkaw 14,000 thlante chu online-a kalpui tur a ni.

Village level committee-te'n April 14, 2023 thleng district level committee hnenah ṭanpuina dawng turte an thehlut ang a, district level committee-in April 28, 2023-ah SEDP Executive Board hnenah an thehlut ve leh ang.

Ṭhutkhawmah hian Lunglei additional DC Donny Lalruatsanga, SDC Lalramenga, line department pakua aiawhte bakah, Lunglei District Village Council Association leh prominent citizen-te an tel a ni.