Tlabung Commercial Vehicle Terminal hawng

Transport minister TJ Lalnuntluanga chuan nimin khan Tlabungah Commercial Vehicle Terminal thar a hawng. Minister chuan, Khawthlangtuipui transport project atan cheng vbc 22.90 sanction tawh a ni a, tender tihfel a nih ṭêp tawh thu a sawi.

TJ Lalnuntluanga chuan, Transport department hmalaknain sorkarin Mizoram lui hmanga inkalpawhna siam dan tur - Inland Water Transport Project lian tham tak a ruahman mek tih a sawi a, "Central sorkar kaltlangin Khawthlangtuipui transport project atan cheng vbc 22.90 sanction tawh niin, tender pawh tihfel ṭêp a ni. He project kaltlang hian hmasawnna leh hna tam tak hmuh a ni dawn," a ti.

Tuichawng, Darzo-Chhimtuipuiah techno feasibility survey zawh tawh a nih thu sawiin Minister chuan, "Mizoram hmun hrang hrangah inland water transport hi lian tham taka kalpui zel tum a ni," a ti a; Tlabung leh a chhehvel khuate sorkarin a ngaih pawimawh thu sawiin, sorkar hmalaknate ṭha taka ṭawiawma finchhuah ṭhin turin mipui a chah.

Tlabung Commercial Vehicle Terminal hi SEDP sum cheng nuai 270 hmanga siam a ni a; a hawnnaah hian bialtu MLA Nihar Kanti Chakma, Transport secretary KT Beicho leh director R Lalrammawia te pawhin thu an sawi. Sorkar hotu te, BSF hotu te leh khawtlang hruaitute an tel a ni.