Mizoram mi 3 thihnaa inhnamhnawih man nia sawi MTP-in an la chiang lo

Kumin March thlaa Mizoram mi pathum Myanmar ram chhunga an tualthihnaa pawi khawihtute an man thu CDF-Mindat chuan an tarlang. Hetih lai hian, Mara Thyutlia Py (MTP) hruaitute chuan, pawikhawihtute man an ni ngei em tih an la chiang ngam lo.

Tarlan tawh angin, New Siaha mi pahnih - C Biaksuii (48) leh Bablu Talukdar (37) leh, South Lungpher mi B Lalṭhafamkima (22)-te chu March 22, 2023 zan khan Siaha district leh Myanmar inrìna bul, Myanmar ram chhungah thia hmuh an ni a, mi kut tuara thi nia ngaih a ni.

Chin Defence Force (CDF)-Mindat chuan April 8, 2023 khan thuchhuah siamin, Mizoram mi pathum tualthihnaa inhnamhnawih mi pakhat chu finfiahna ṭha tak nen an man thu an tarlang a; mi pathum thihnaah CDF-Mindat an inhnamhnawih loh thu te, mitthi chhungte an tawrhpui thu te, thu dik a lan theih nan theihtawp chhuah an inhuam thute an tarlang bawk.

Hetih lai hian, Vanglaini palai zawhna chhángin MTP hruaitute chuan, mi pathum tualthihnaa inhnam-hnawihte man an ni ngei em tih an la chian loh thu leh CDF-Mindat hruaitute an biak theih loh thu an sawi a, "Mizorama thuneitute hnenah hlan ni se kan duh a, anni pawhin an duh niin a lang. Mahse, tun thlengin an mi man thlalak pawh kan la hmu lo a, an thil sawi hi zaa zain kan la ring ngam lo," an ti.

Mi pathum tualthihna avang hian kumin March thla tàwp lam aṭang khan Siaha district leh Lawngtlai district-a Myanmar kalpawhna kawngte khâr vek a ni a; hei vang hian Myanmar lama ramri hnaiha awm mipui an bengchhen tawh thu leh mipui thâwm a rin tawh thu MTP hruaitute chuan an sawi a ni.