MGNREGS hmanga mahni party duhsakah VC-te'n sorkar an puh

All Mizoram Village Council Association (AMVCA) chuan, Mahatma Gandhi National Rural Employment Guarantee Scheme (MGNREGS) hnuaia material component chu party mite induhsakna atan hmangah Mizoram sorkar an puh a; an kalphung siamṭha turin sorkar an phût.

AMVCA hian nimin khan Aizawl Press Club-ah thuthar thehdarhtute an kâwm a; an president Lalremsanga Fanai chuan, Rural Development Minister Lalruatkima kaihhruai Mizoram State Employment Guarantee Council (MSEGC)-te February 11, 2019-a ṭhukhawmin MGNREGS-ah wages 60% leh material component 40% tura ruahmanna an siam thu sawiin, "A hma chuan 90:10 in a kal ṭhin," a ti.

Lalremsangi Fanai chuan, guidelines ang chuan MSEGC-ah non-official member-ah thingtlang mipui aiawh thlan chhuahte aṭangin mi 15 aia tam lo leh hmun thuma ṭhena hmun khat hmeichhia ruat tur a nih thu sawiin, "Mizoram sorkar MSEGC chhungah chuan heng hi telh an ni lo," a ti a, MSEGC-ah party mi duhsak zawngte ruat an nih thu a sawi.

MNF party-in eptu an nih laiin MGNREGS material component kalpui dan chu ruling party induhsakna atan hmangah sorkar an puh ṭhin tih sawiin AMVCA President chuan, "Tunah sorkar a inthlâk a, ruling party block-te chu material component hna khawihtu leh work order hial petu an lo ni ta zawk. BDO pisa hmangin ruling MLA leh block-te'n thuneihna an chang a ni ta ber," a ti.

AMVCA hruaitute chuan, thingtlang mite chanvo tur nia an ngaih pawh khawpui mite'n an chhuhsak nasa tih sawiin, "Material component hnate chu District Employment Council, Block Employment Council leh Village Employment Council hmingte'n a chhuak ta chuai chuai a ni," an ti a; District Employment Council leh Block Employment Council-ah VC-te an tel ngai loh thu an sawi. 

BDO pisa aṭangin kalphung a dik loh thu sawiin AMVCA hruaitute chuan, "Sorkarin a duh ang anga party induhsakna turin material component 40% laia a tihsan chhan niin a lang. An kalphung hi Mizoram sorkarin a rang thei ang bera a siamṭhat loh chuan material component atana 90% sorkar laipui aṭanga lokal hi a tawp a hlauhthawnawm," an ti.

AMVCA hruaitute chuan, Village Food Security Selection Committee chungchang sawi langin, "Mizoram sorkarin gazette a chhuah 'The Mizoram Food Security Rules 2015, June 26, 2015 Rules No. 8' Selection Committee a siam hi Mizoram thingtlang khaw tan hman tlak a ni lo," an ti a; Rules chu ruling party hruaitute'n DCSO kaltlanga political party mite an ruatna a nih thu an sawi.

Sorkar hmasain dan a kalpui tawh chu eptu party leh mipuite'n nasa taka an sawisel thu sawiin AMVCA hruaitute chuan, "Tuna hripui léng leh thingtlang lama harsatna thleng mekah Village Food Security Selection Committee din thar a, sorkar hmasa kalpui ang thoa a kalpui hi rang taka ṭhiat a, he dan ṭha lo tak hi siamṭha nghal turin sorkarin kan phût a ni," an ti.