Mizoram sorkarin ramria a thu thlenah Assam sorkarin thu leh hla la nei lo

Mizoram sorkarin Mizoram ramri china a pawm leh thil dangte Assam sorkara a thehluh chungchangah Assam sorkarin thu leh hla a la nei lo.

Vanglaini palai zawhna chhangin Home secretary H Lalengmawia chuan, ramri chungchanga Mizoram ngaih­dan an thlenah Assam sorkarin thu an la neih loh thu a sawi a, "Rin aiin an ngawi rei khawp mai. Kan thu thehluh an zir chiang ang a, eng emaw rawn sawi chu an neih ngei kan ring," a ti.

H Lalengmawia chuan, ramri chungchanga Assam sorkar nena inbiak leh hun tur hriat a la ni lo tih sawiin, "Kan thu thehluh min rawn chhanna aṭangin inbiak leh hun tur pawh a la hriat theih ang," a ti a, inbiak leh hun tur sawi a awm rih lo tih a sawi.

November 17, 2022-a Guwahati, Assam-a Mizoram sorkar leh Assam sorkar aiawhte inbiak ṭumin Joint Declaration-ah Mizoram sorkarin ramri china a pawm chhunga khaw awm te, an huam chin te, geo spatial extent te, a huam china chengte hnam chanchin leh chi (ethnicity)-te leh chanchin dangte Assam sorkarah thehlut tura tih a ni.

Joint Declaration-ah chuan, "Heng chanchin thehluhte hi ramri buai chinfelna tura la din tur state pahnih aiawhte telna Regional Committee-te'n an enfel ang. Chanchin lâk khawm kawngah Assam sorkar chuan Mizoram hi a theihna apiangah an pui ang," tih a ni.

Inbiaknaa Assam team leader Atul Bora, Border Protection & Development minister chuan April 2023 thla tìr khan Mizoram sorkarin a thil phûtte an thehluh tawh thu a sawi a, "Rei tak Mizoram Home Minister kaihhruai Mizoram aiawhte nen kan inbe tawh a, tun ṭumah hi chuan eng emaw tak a thleng tawh ang," a ti.

Tarlan tawh angin, Assam leh Mizoram ramria Mizoram sorkar dinna chu Bengal Eastern Frontier Regulation 1875 a ni.