LMC-ah Chairman, Vice Chairman leh Executive councillor 2 an awm dawn - Tawnluia

MNF party chuan nimin khan an pisa, Mizo Hnam Rûnah Lunglei Municipal Council inthlana an party candidate-te lawmna inkhawm an buatsaih a; MNF senior vice president Tawnluia, UDPA minister ni bawk chuan LMC-ah chairman leh vice chairman bakah executive councillor pahnih an awm dawn thu a sawi.

Tawnluia chuan, LMC din chu MNF Manifesto tihhlawhtlinna a nih thu sawiin, "Khawpuiah municipal council pek a ni ang tiin kan tiam a, Lunglei, Champhai leh Kolasib-in municipality an dil. MNF sorkar hnuah cabinet meeting-in a pawm a, LMC din a ni. Inthlan buatsaih a nih zawh hnuah LMC ruangám a rawn ding chho ta a, LMC-ah hian chairman, vice chairman leh executive councillor pahnih an awm dawn," a ti.

LMC councillor tura thlante thawhpuiah sáwmin Tawnluia chuan, "Danin a phal chinah chuan chak takin theihtawp ka chhuahpui dawn, chumi tur chuan councillor thlan tharte pawh lo inkau deuh se ka duh," a ti a; Lunglei khawpui enkawlnaah tih tur a awm chuan sorkar angin an tlânchhe dawn lo niin a sawi.

Deputy Chief Minister chuan, "Lunglei khawpui hi MNF sorkar hian a ngaih­thah hran lo a, LMC-a kan tlin loh avangin kan ngaihthah dawn lo a, a hma aia nasain kan ngaihsak dawn a ni," a ti.

MNF chu an tih theih piah lamah Pathianin kawng a siamsak a, a hruai ṭhin tih sawiin Tawnluia chuan, "LMC-ah kan nil hi chuti em ema MNF demna leh chauhna tur a ni lo. Politics-ah chuan sàn cháng leh hniam cháng a awm. Chung lamin kan harhna tur, kan hriat tur min hrilh tawh," a ti a, hna an thawk zel ang a, kumina Mizoram inthlanpuiah an chak leh dawn niin a sawi.

Nimina inkhawmah hian LMC inthlana MNF candidate-te hnenah Mizo National Women Front-in pangpar an hlan a ni.