Min hêknaah thu dik a lang mek - Robert Romawia

Minister of state Robert Romawia Royte chuan, MLA aṭanga bàn tura ZPM party-in Election Commission of India an ngen chungchangah thu dik a lang chhuak mek niin a sawi.

Robert Romawia Royte hian nimin khan MNF zawm tharte West Bunghmun hall-a a lawm luhna inkhawmah thu sawiin, "ZPM party-in Governor-a MLA aṭanga báng tura min hêkna chu Assembly House-a ZPM leader Pu Lalduhoma'n dâwt a sawi avanga ngaih­dam min dil vang niin mipuiin an ngai. Min hêknaah thu dik a lang chhuak mek a, hun nei tlém tawhah an inngai nge ni, vawiinah pawh keima chungchangah Vanapa Hall kawtah a vawi thum nan an kal khawm leh," a ti.

Robert Romawia chuan, Mamit district chu India rama district hnufual zual 124 zingah a tel avangin district hmasawnna tura mumal taka ruahmanna siam chuan sum pe turin sorkar laipui a inhawng hle nia sawiin, "Hei hi Sports department leh ICT department-in project an siamte hmanga Mamit district hmun hrang hranga hmasawnna hna an thawh hian a takin a tichiang. Hachhek bial hi MLA bial hmasawn chak ber ni turin ṭan kan la dawn," a ti a; tunah pawh ruahmanna thar siam mek a nih thu a sawi.

MNF adviser Robert Romawia hian MNF zawm thar mi 130 a lawm lut niin MNF thuchhuah chuan a tarlang.