Minister/ MLA aṭanga Robert Romawia bàn phûtin Vanapa Hall kawtah ZPM party an pungkhawm

ZPM party mite chu nimin khan dan bawhchhiaa an puh Robert Romawia Royte minister/ MLA aṭanga bàn phûtin Vanapa Hall kawtah an pungkhawm a, bàn ngei an phût thuin an au rual.

Punkhawm hi ZPM chuan 'Dikna Duh Punkhawm' tih an vuah a; ZPM Action Committee chairman W Chhuanawma leh ZPM general secretary SL Ngursailova Sailo ten thu an sawi. SL Ngursailova hi MLA aṭanga Robert Romawia Royte bàn tura ngenna Governor hnena ZPM party aiawha thehluttu a ni.

W Chhuanawma chuan, an kalkhawm chhan chu dikna tung ding tur leh danin a tih tur te, a kalkawngte kawhhmuh turin a nih thu a sawi a, "Chu kawngah chuan mimal hming a lo lang a nih pawhin chumi chu a mimal takin ZPM hian kan haw ngawt lo. Amaherawhchu, chu kawng aṭang chuan nam sawn kan tum mai a ni," a ti.

ZPM-te'n politics-ah an ṭan loh zawng an nih avang ngawtin dâwt leh thu dik chawhpawlh emaw, dâwt ngialngan emawa inchirhtheh leh inbeih ṭha an ti lo tih sawiin W Chhuanawma chuan, "Amaherawhchu, thil dik lo leh corruption-a inhnamhnawihte chungah erawh chuan zahngaihna kan lantir dawn lo," a ti a; Pathian leh mipui zara ZPM an sorkar chuan an hna hmasa ber tur chu corruption do a nih thu a sawi.

SL Ngursailova chuan, Robert Romawia Royte chu North East Consultancy Services (NECS)-ah proprietor a ni a, February 14, 2023 thleng khan NECS proprietor a nihna angin chhiah (GST) a la pe tih a sawi a, "Hetih lai hian, a fapa Vanlalfelpuia Royte pawhin a hnu lamah chuan NECS proprietor angin chhiah a pe ve leh tho a ni," a ti.

SL Ngursailova sawi danin, CAG report-a a lan dan chuan, NECS hnenah hian Robert Romawia'n MLA/minister a nih hnuah October 2021 khan Mizoram sorkarin Police Headquarters building, Khatlaa sakna leh 3rd IR Battalion Headquarters, Thingkaha sakna bill-te chu pek a ni tih a lang.

Chutih laiin, NECS hian Women’s Jail, Aizawl chu kum 2020 chhoa an sak zawh chu dik tak leh langtlang takin November 2018-a Election Affidavit (Form–26) a thehluhah a ziah lan loh (not declared) avangin false affidavit case, Representation of People’s Act, 1951 Section 125 a awrh ngei turah an ngai bawk.

Robert Romawia Royte an puhna lian ber leh pawi bera an ngaih chu, June 17, 2022-a NECS leh Mizoram sorkara District Council & Minority Affairs department (PMJVK scheme nodal/implementing agency) ten single source selection-a deed of agreement an ziah a ni.