KHAWTHLIR

Covid vei 3 awm

April 12, Nilainia Mizorama swab sample pahnih endikte Covid-19 positive ve ve a ni tih hmuh chhuah niin, tun April thlaa hmuh chhuah hmasak ber an ni a, tun hnaia zin chhuahna nei lo ve ve an ni. Heti hian Mizoramah Covid-19 vei mi pathum an awm mek. Mizoramah sample 19,93,567 endik tawh niin, positive 2,38,972 hmuh a ni tawh a, positive zinga mi 726 (0.3%) an thi tawh a ni.

PYD-in thisen pe

Penticostal Youth Department (Mizoram), Siaha chuan nimin khan Siaha District Hospital tan thisen unuit 21 an pe a, petute mipa 19 leh hmeichhia pahnih an ni.

Dr BR Ambedkar pualin hun hmang

Hrangbana College-a Department of Political Science chuan Dr BR Ambedkar pian champha, April 14 pualin nimin khan an college-ah zirhona an buatsaih. HBC associate professor Dr H Lalzuithangi'n Dr BR Ambedkar-a nun dan, harsatna a tawh dan leh dikna sual chhuak tura a beih dan te, chi inthliarna avanga harsatna a tawh dan te, Indian Constitution duannaa a thawh dante a sawi.

MLA-in tlawh kual

Mamit bialtu MLA H Lalzirliana chuan nimin khan a bial chhunga Teirei Forest khuaa khelmual laih mek te, Tuipuibari khuaa khelmual siam mek leh community hall sak thar te, Tupuibari leh West Kawnpui inkar kawng siam mekte a tlawh. Kawng siam mek chungchangah, kawng siamtu LT Constructions chu chak taka thawk turin a chah a, theihtawp chhuah turin sorkar hotute a ngen bawk.

MUCO Bank Special Assembly

MUCO Bank chuan nimin khan Taxation conference hall-ah Special Assembly an hmang a, Banking Regulation Act, 2020 angin bye-law an hman lai an siamṭha. June 2023-ah MUCO Bank Board of Directors tur thlan a ni a, inthlanah hian bye-law an siamṭhat tâk angin Board of Directors turte chu thiamna bik nei thlan a ngai tawh dawn a ni.

Minister-in tlawh

Sports minister Robert Romawia Royte chuan nimin khan Mamit district-a infiamna kaihhnawih hmunhma sak mek - PMJVK sum nuai 3,400 sénga sak Mamit Residential Sports School, nuai 1,250 sènna tur Mamit Multipurpose Indoor Hall sak mek leh nuai 4,400 sénga Bâwngvaa Mamit District Sports Complex sak mekte a tlawh.