Ráltlânte ṭanpui turin mipui ngen

Zo Reunification Organisation (ZORO) chuan nimin khan Aizawl leh a chhehvela ráltlân awm khawmna hmun (refugee camp) hrang hrangah ṭanpuina an sem a, ṭanpuina pe turin Mizoram mipui an ngen nghal. Sahimna zawnga Myanmar aṭanga rawn lut Mizoram hmun hrang hrangah mi 5,191 an awm mek angin an chhinchhiah tih an tarlang.

ZORO chuan an hnuaia Refugee Committee hmalaknain Aizawl leh a chhehvel - Nghalchawm, Sihhmui, YHAI Hostel leh Durtlanga refugee camp-ahte ṭanpuina buhfai leh chawhmeh chi hrang hrang bakah, naupang lehkha zirna atana ṭulte an pe a ni.

ZORO tarlan danin, Synod Camping Centre-ah ráltlânte awm ṭhin mah se, Synod-in hman an duh tawh avangin Vanlalmawia in, Leitan South-ah sawn an ni. An chhinchhiah danah chuan, Mizoramah Myanmar aṭangin ráltlân mi 5,191 an awm mek a, anmahni ṭanpuina a luh tawh meuh loh avangin harsatna an tâwk nasa ṭan hle tih ZORO chuan an tarlang.

Myanmar aṭanga ráltlânte Mizorama an rawn luh aṭangin hun eng emaw ti chhung chu Mizoram mipui, sorkar leh pawl hrang hrangin theihtawp chhuahin an lo pui tih sawiin ZORO chuan, "Lawmawm kan ti hle. Kum hnih thum a vei meuh chuan Mizo mipui rilruah a lo thi ṭan a, kan sorkar a ngáwi a, NGO-te'n kan tih theih a tam tawh lo a, kan unau ráltlânte hi kan hlamchhiah ṭan ta niin a lang. Burma ram a buai zual zel si a, ṭanpuina a lut ṭha tawh lo nen, harsatna nasa tak an tâwk chho ṭan ta a ni," an ti.

Ráltlânte a theih ang anga chhawmdàwl an nih theih nan ZORO chuan hma lain, an harsatna leh chhawmdawl dan turte ngaihtuaha zir chiang turin Refugee Committee an din a; Mizoram sorkar, mipui leh páwl hrang hrangte chu harsatna tâwk mek ráltlânte'n chenna leh ei leh in tur an neih theih nan theihtawp chhuah turin an ngen a ni.