SEDP thawh hnihna sem dan tur sawiho

Kolasib District SEDP Committee chu nimin khan an chairman John LT Sanga, bawrhsap hoin DC conference hall-ah an ṭhukhawm a, Socio Economic Development Programme ṭanpuina sum sem thawh hnihna kalpui dan tur an sawiho.

John LT Sanga chuan, Kolasib district khaw hrang hranga eizawnna bul ṭan nan leh ei leh bara intodelh nan SEDP Phase-I kaltlangin hmalakna ṭha tak kalpui a nih thu a sawi a, "Phase-II kalpui chhunzawm leh tur a ni a, SEPD hnuaia hamṭhatna dawngtute'n eizawnna rin tlak an neih theih nan department hrang hranga thawktute'n uluk tak a an vil a pawimawh," a ti.

Kolasib-a SEDP nodal officer Lalruatpuii, SDC tarlan danin, SEDP Phase-II kalpui chhunzawmna turin MLA bial pakhat aṭangin mi 1,400 zel thlan tur a ni a, SEDP sem thawh khatnaa hamṭhatna dawng tawhte pawhin ṭanpuina an dawn chhunzawm dawn. Thawh hnihnaa tel turte hming chu April 21, 2023 ral hmaa thehluh tur a ni a, hming thehluhte chu DC pisaah online-a ziah luh vek tur a ni.

SEDP hi Kolasib district-ah line department pakua - Agriculture, Horticulture, Fisheries, Urban Development & Poverty Alleviation, Commerce & Industries, AH & Vety, Sericulture leh Land Resources, Soil & Water Conservation hnuaiah kalpui a ni.

Kolasib district-ah hian MLA bial pathum a awm a, SEDP dawng tur mi 4,200 thlan tur a ni. SEDP Phase-II dawng turte chuan Phase-I ang thoin ṭanpuina Rs 25,000 an dawng phawt dawn a ni.