MADC VC inthlan tur sawiho

Siaha district election officer (DEO) Lalhmunsanga Hnamte, bawrhsap chuan nimin khan April 18, 2023-a village council inthlanpui neih tur chungchangah Siahaa thuthar theh-darhtute a kâwm a; a ṭulna apiangah thurâwn pe ṭhin turin a sáwm.

Lalmuansanga chuan, VC inthlan tur chu felfai leh muanawm tak a nih theih nan thuthar thehdarhtute chu sorkar thawhpui zel turin a sáwm a, "Mipui hnena Model Code of Conduct puanzarh kawngah te, vote thlak pawimawhzia leh inthlan kaihhnawih puanzar ngai thil hrang hrangah MJA-te hi kan inngahna in ni," a ti.

Siaha district-ah hian VC 99-ah seat 591 a awm a; general seat 393, hmeichhe seat 99 leh nominated seat 99 a ni. VC inthlan turah hian candidate 1,250 an awm a; BJP-in candidate 454, INC-in candidate 261, MNF-in candidate 402, ZPM-in candidate 84 an nei a, independent candidate 49 an awm bawk. Candidate zinga 1,011 chu general seat chuh tur an ni a, mi 239 chu reserved seat (hmeichhie seat) chuh tur an ni.

VC 99-ah voter 43,120 an awm a, mipa 20,794 leh hmeichhia 22,326 an ni a, mipa aiin hmeichhia 1,532-in an tam.