Ṭanpuina dawngtute hmalak dan endik

Lunglei High Powerd Committee (HPC) buatsaih Leitlangpui Rahbi 2021-22 Micro Start Up Capital Competition-a lawmman dawngtu mi 47-te hmalaknate chu nimin khan sorkar hotute'n an enfiah.

Mi 47-te'n an buaipuite chu - ranvulh, leirawhchan siam, language hub, screen printing, salon & spa, fitness centre, paper cup siam, videography, tomato sauce siam, audio & video studio siamte a ni a; sum an dawn tur aṭangin 75% pek an ni tawh. Nimin khan an sum dawnte an hman dan leh an hmalak dante endik a ni a, endikna chu zir chian a nih hnuah ṭanpuina 25% dang pek leh a ni ang.

Leitlangpui Rahbi Micro Start Up Capital Competition hi Planning & Programme Inplementation department leh Lunglei HPC ṭang dun hmalakna a ni a, June 6, 2019 khan chief minister Zoramthanga'n a hawng. Rahbi thawh khatna (2019-20)-ah khan mi 15 hnenah bul ṭanna sum pek a ni a, a thawh hnihna (2020-21)-ah mi 23 hnenah pek leh a ni.