Loneiha ICT hman ṭangkai dan zirho

Agriculture minister C Lalrinsanga chuan nimin khan Aijal Club-ah 'National Webinar on Awareness and Use of Information and Communication Technology (ICT) among the Farmers of Mizoram' a hawng a; loneitute tan information and communication technology hmanraw hrang hrangah Mizo ṭawng telh ni se a duh thu a sawi.

C Lalrinsanga chuan, ICT hmanruate chu tihchangtlun a, loneitu tam zawk hnen thleng phâk tur leh an hriatthiam theih tura hmalak a ṭul thu a sawi a, "ICT hmanruate hi loneitu tam takin an hmang ṭangkai ṭan hle a, lo neih dan kalphung pawh zâwi zâwiin a siam ṭha zel. ICT hmanraw hrang hrangah Mizo ṭawng telh chhoh zel ni se, loneitute'n an ṭangkaipui lehzual ang," a ti a; Mizoramin Krishi Vigyan Kendra a mamawh belh thu a sawi bawk.

Webinar hi Agriculture joint director Vanlalthlamuana'n a kaihruai a; New Delhi-a ICAR-NCIPM director Subash Chander pawhin thu sawiin, "Loneitute'n chemical fertiliser leh pesticide a chuang liama an hman ṭhin hian nghawng ṭha lo tak a nei ṭhin," a ti a, biofertiliser leh biopesticide hmang tam a nih theih nan hmalak a pawimawh thu leh chuta tan chuan ICT a ṭangkai dawn thu a sawi.

Zirhonaah hian agriculture-a ICT hman ṭangkai dan tur zir a ni a, ICAR-NCIPM mithiam te, Mizoram Agriculture department leh KVK Lawngtlai leh Siahaa thawkte'n thil pawimawhte an zirtgir a ni.