Nausen thih chhan tam ber - thla kim lo Nau chunga thih chhan tam ber - thi pût
Mizorama nausen thla khat la tling lo thihte thih chhan tam ber chu thla kim loa pian vang a ni a; nu, nau chunga thite thih chhan tam ber chu nau neih zawha thi pût vang a ni.
Health Services Directorate hmalaknain tun hnai khan Mizorama nautê kum khat hnuai lam thihna leh nu nau chunga thihna chhan hrang hrangte zirchianna 'A study of factors influencing infant mortality rate and maternal mortality rate in Mizoram' buatsaih a ni a; zirchiannaa hmuh chhuahte chu August 4, Thawhlehni khan Health principal director Dr F Lallianhlira hoin a pisaah sawiho a ni.
Zirchiannaa hmuh chhuah dan chuan, nausén thla khat hnuai lam thih chhan tam ber chu thla kim loa pian vang a ni a, thla kim loa piangte zingah harsatnain a tlâkbuak leh thisena infection awm (neonatal sepsis) a tam bik a ni. Thla khat leh kum khat inkarah erawh chuan, nausente thih chhan tam ber chu pneumonia a ni thung.
Nausen kum khat hnuai lam thi zinga a tam zawk chu an pian aṭanga darkar 24 chhungin an thi a ni. Kum khat hnuai lam thihna chu nuin nau a hrin vawi khatnaah te, hringtu nuin thisen sang emaw, zunthlum emaw a neih vang te, sahdah hmuam, kuhva ei leh zu in ṭhinte zingah a thleng duh bik tih hmuh a ni bawk.
Nau chunga nu thihna tam ber chu nau neih zawha thi pût vang a ni a; nau chunga thi hmun thuma ṭhena hmun khat chu in lama nau neite niin, chu'ng zinga 40% vel chauhin nau an pài laiin doctor hnenah an inentir ṭhin.
Zirbingna buaipuitu Research Team-ah hian doctor pasarih bakah, research scholar leh research assistant 13 an awm tel a, Mizorama khaw 190 an tlawh a ni. Study participant 1,315 awmin, kum khat hnuai lam naupang thi 343 leh nu, nau chunga thi 17-te zir bing an ni a, naupang kum khat hnuai lam dam ṭha 955-te nen khaikhin a ni.
Zirchiannaa hmuh chhuahte sawihona hi Health & Family Welfare Principal Director-in a kaihruai a; zir chiangtute zinga principal investigator Dr John Zohmingthanga'n zir chianna an neih dan sawiin, co-investigator Dr Zorinsangi, public health specialist-in an zir chhuah tlangpui a sawi thung.