Siahaah TrueNAT laboratory thar

Siaha District Hospital-a TrueNAT laboratory bun thar, 10KVA ge­nerator dah thar leh mini fridge pali dah thar chu August 4, Thawhlehni tlai khan district bawrhsap Bhupesh Chaudhary-a'n a hawng.

Thil thar hawnna inkhawm, hospital conference hall-a neih hi chief medical officer Dr C Hnichho-in a kaihruai a; Bhupesh Chaudhary chuan, TrueNAT laboratory hmangin Covid-19 vei leh vei loh endik theih a nih bakah, natna hrik dang chi 15 vel endik theih a ni tih a sawi a, "Tunah chuan inentir tura district páwn lama kan kal chhuah a ngai tawh dawn lo a ni," a ti.

Siaha DC chuan, Covid-19 donaah mi tinte lungrual taka ke an pênna chu Pathianin mal a sàwm tih sawiin, "Tun thlengin Siaha district-ah Covid-19 vanga lu hloh kan awm lo a, positive-te pawh an dam chhuak leh vek tawh a, tunah chuan hripui lakah kan fihlim rih a ni," a ti a; Mizoramah Covid-19 vei hmuh belh zel a nih avangin inthlahdah thei an ni lo tih a sawi bawk.

Siaha District Hospital-in mini fridge pali an neih thar hi CSR fund aṭanga lei a ni a, generator pawh DC-in a leisak a ni. DC hian CSR fund aṭangin district hospital hnenah medical mobile unit van leh ambulance pahnih a lo hlàn tawh bawk.