Jan. 1, 2019 leh Jan. 31, 2023 inkarah a ngheta thawk tur doctor 53 lâk a ni; SEDP hnuaiah mi 525 lâk a ni tawh

Health & Family Welfare department chuan January 1, 2019 aṭanga January 31, 2023 inkarah Mizoram sorkara a ngheta thawk tur doctor 53 a la a, MNF sorkar flagship programme SEDP hnuaiah HFW department hnuaia thawk tur mi 525 lak a ni bawk.

RTI Act tlawhchhana zawhna HFW department SPIO-in a chhan danin, Mizoram sorkar chuan January 1, 2019 aṭanga January 31, 2023 inkar khan HFW department-a a ngheta thawk tur (regular employee) mi 80 a la a, chu'ng zinga mi 53 chu doctor (allopathy) an ni. A ngheta thawk tur an lâk dangte chu - medical officer (AYUSH) pakhat, clinical research officer pakhat, UDC panga, LDC paruk leh group D mi 14 an ni a; a ngheta thawk tur lak dawnah advertisement chhuah vek a nih thu an tarlang.

January 1, 2019 aṭanga January 31, 2023 inkarah vêk state sorkara a nghet loa thawk (contract/ provisional employee) tur mi 63 lâk an ni a; chu'ngte chu drugs inspector pathum, assistant drugs inspector pakua, staff nurse 25, data entry operator 10 leh group D 16 an ni.

AYUSH hnuaia contract (CSS)-a thawk turin medical officer (AYUSH) pasarih, Health & Welness Centre-a thawk tur medical officer (AYUSH) 38 leh post dang dangah mi pali lak an ni bawk.

HFW department-ah SEDP hnuaia thawk turin January 1, 2019 aṭanga January 31, 2023 inkarah mi 525 lak an ni bawk a, hna lakna (recruitment) pawh SEDP Health & Family Welfare Board-in an buaipui.

SEDP hnuaia thawk tura lakte chu - health worker 260, staff nurse 26, casual helper 38 leh helper 201 an ni. Heti hian January 1, 2019 aṭanga January 31, 2023 inkara HFW department-a thawk tur lak zat chu (NHM hnuaia lakte tel loin) mi 717 an ni a; state sorkara a ngheta thawk tur mi 80, contract/PE mi 63, AYUSH hnuaia lak mi 49 leh SEDP aṭanga lak mi 525 an ni.

Hetih lai hian, NHM lamin zawhna an chhàn ve loh avangin NHM hnuaia thawktu lâk zat hriat theih a ni lo a; zawhna hi January 30, 2023-ah online hmangin thehluh a ni a, thla hnih chuang hnu, April 14, 2023 thlengin chhanna an siam lo a ni.

HFW department SPIO chuan, January 1, 2019 aṭanga January 31, 2023 inkarah state sorkara a ngheta thawk doctor 30 chu pension-in an chhuak tih a tarlang bawk.