Martyrs Day/ Fire Service Week hman a ni
Fire & Emergency Services (FES) chuan nimin zing khan an headquarters leh fire station hrang hrangah Martyrs Day an hmang a, Fire Service Week an hmang ṭan nghal bawk.
Martyrs Day hi FES Headquarters, Hunthar Vengah chuan nimin zing dar 7 khan hman a ni a, Aizawl khawpui páwn lama fire station-ah chuan zing dar 9-ah hman a ni thung. Kum 2022 chhunga India rama kângmei chhuak ṭhelhnaa thi mi pathum hming chhiar chhuah a ni a, anmahni sûn nan minute khat chhung ngawi rengin an ding a ni.
Kângmei chhuak ṭhelhnaa kum 2022-a thite chu - Delhi Fire Service-a fire operator Praveen Kumar, Goa Fire & Emergency Services-a leading firefighter Vasudev Sadashiv Haldankar leh, Uttarakhand Fire & Emergency Services-a fireman Nitin Singh te an ni.
Fire & Emergency Services tarlan danin, India ramah kum tin April 14-20 chhungin Fire Service Week hman ṭhin a ni a, April 14 bik chu Martyrs Day/Fire Service Day tiin an vuah.
April 14, 1944 khan Indo lawng lian Fort Stikine, ralthuam leh bomb tam tak phurtu chu Bombay (Mumbai) lawng chawlhhmunah a kâng a, lawng kâng ṭhelhnaah Bombay Fire Brigade mi 66 leh Bombay Salvage Corps mi 11 an thi a, chu'ng mitthite hriat rengna atan April 14 chu Fire Service Day-ah puan a nih bakah, April 14-20 chu Fire Service Week atan hman zui a ni.
Week chhungin kângmei laka himna tur zirtirna hun hman a ni ṭhin a, kuminah pawh Mizoram FES chuan sikul hrang hrangah Fire Safety Awareness an hmang dawn a, sorkar hmun pawimawh leh damdawi-inahte kângmei laka invênna an neih ṭhat leh ṭhat loh an endik bawk ang.
Week thupui chu 'Kângmei laka fimkhur nachang hriat hi ram hmasawn zelna atan a pawimawh’ tih a ni.