April 18-ah LMC sorkar la lut dawn

Lunglei Municipal Council (LMC) sorkar hmasa ber chu April 18, 2023 khian lak luh a ni dawn a; chairman tur leh hotu dangte pisa tur cheibàwl mek zel a ni.

LMC sorkar thar lak luh hun tur hi April 18, 2023 a nih thu Lunglei district bawrhsap Ramdinliani chuan Vanglaini palai zawhna chhângin a sawi a; sorkar lak luhna inkhawm hi ṭhutkhawm hmasa ber (first board of councillor meeting) a ni nghal bawk.

LMC-ah hian ward awm zawng zawng, ward 11-ah ZPM party candidate-te thlan tlin an ni a, LMC sorkar tharah hian chairman tur chu Ward-III aṭanga thlan tlin Lalzuithanga niin, vice chairman tur chu Ward-VII aṭanga thlan tlin K Lalrinawma a ni. Sorkara hotu turte chu Bawrhsapin rinawmna thu tiamtirin a la lut ang.

Tarlan tawh angin, danah chuan LMC-ah hian executive councillor pathum an awm thei a, mahse, Mizoram sorkar chuan executive councillor pahnih awm turin a ti nia thu dawn a ni. Roreltu tur ZPM party thuneitute chuan executive councillor turte an tifel tawh a, dan angin chairman-in mawhphurhna a lak hunah a puang dawn nia thu dawn a ni bawk.