Sorkara beidawng ngawih ngawih turin eptute'n mipui leh ṭhalaite an fah - MNF President

MNF president Zoram­thanga, chief minis­ter chuan, a kaih­hruai sorkar chu a chhe thei ang bera social media-a beiah leh sorkara beidawng ngawih ngawih tura mipui leh ṭhalaite fahah eptu party-te a puh.

Zoramthanga hian nimin khan Serchhip Auditorium-a MNF Serchhip East leh West Joint Block Conference a hmanpuinaah thu sawiin, eptute'n social media-ah a kaihhruai sorkar chu a chhe thei ang berin an bei niin a sawi a, "Zoram chhe lailet dêr angin an chhuah. Mipui leh ṭhalaite sorkar laka beidawng ngawih ngawih turin an fah a ni. Chuvangin, beihpuiin kan bei ve tawh dawn," a ti.

LMC inthlana an tla fai vek chu hrehawm an tih thu leh an zah thu sawiin MNF President chuan, "MNF hotu pawi­mawh zawng zawmg kan ṭhukhawm tawh a, chuta kan thu chu, 'Tho rawh, eng nge kan tih dik lohna lai, eng nge kan chak lohna, kan khingpuite'n min beihna zawng zawng hi eng nge ni' tih a ni," a ti a; Lungleia an tlâkna chu inkaih harhna atan an hman tur thu a sawi.

Zoramthanga chuan Serchhipa a kal chhan sawiin, "Tho rawh u, kan dingchhuak leh dawn, tia rawn au tur che uin vawiinah hian ka lo kal a ni," a ti.

MNF President chuan, MNF chuan harsatna hrang hrang a paltlang vek a, party senior ber pawlah an awm thu sawiin, "Hei hi a chhan chu kan thuthlung 'Pathian leh kan ram tan' tih kan vawn tlat vang a ni. Tui anga nghet lo hi Lalpa'n a lungphùm phùm nan a duh lo," a ti a, tui anga nghet lo chu kum 40 deuh thaw an la enchhin loh thu a sawi.

Eptute'n an sawiselna - SEDP leh SASCI-te chu Pathianin malsawmna a pek a nih thu sawiin Zoramthanga chuan, "MNF hian harsatna tam tak kan hmachhawn tawh, nimahsela, Pathianin min hruai chhuak leh zel a ni tih i pawm ngam ang u. Vanduainaa kan ruat hi malsawmna a lo ni zawk ṭhin," a ti.

Inkhawmah hian MNF adviser J Malsawmzuala pawhin thu sawiin, mi ṭhenkhatin sum hman chungchangah Chief Minister an beih ṭhin thu a sawi a, "Vawiin thlengin ei leh bàr, gas leh thil dangah kan hnianghnâr em em. Kan sorkar hian nasa takin Serchhip bialah hmasawnna hna a thawk a ni," tiin, sorkar chunga a lawm thu a sawi.

MNF thuchhuah chuan, nimina inkhawmah hian MNF zawm thar mi 146-te MNF President-in a lawm lut niin a tarlang.