KHAWTHLIR

Chama Biate-ah

Hrangturzo bialtu MLA Lalchamliana, minister chuan nimin khan a bial chhunga Biate khua a tlawh a; kumin October thlaa Biatea YMA General Conference neih tura inbuatsaihna a enpui a, Organising Committee hruaitute nen hmalak zui zel dan tur an sawiho.

MLA-in hmanpui

MLA Dr ZR Thiamsanga chuan nimin khan Hnahlan community hall-ah MHIP, Hnahlan Block Meet a hmanpui a; khaw hrang hrangah MHIP branch-te tan MHIP rûn thuam ṭhat zel a nih thu leh sak ṭhat tur pawh a awm nual thu sawiin, "Theihtawp kan chhuah zel ang," a ti. Inkhawmpui thupui chu 'Thianghlimna' tih a ni a, Padma Shree dawngtu B Sangkhumi, MHIP Gen.Hqrs. vice president ni mek hnenah chawimawina an hlan a ni.

Police-in meth man

Special Narcotics Police Station leh 2nd Assam Rifles-te chuan April 13, Ningani khan Bawngkawn Lunglei road-ah methamphetamine kg. 1.018 (mûm 10,000) an man a, cheng nuai 200 hû a ni. Ruihhlo neitu zawn mek a ni a, Special Narcotic PS-ah NDPS Act hnuaiah thubuai ziah luh niin, chhui zui mek a ni.

Paulownia inzirtir

Khawzawl DRDO chuan nimin khan Chawngtlai leh Tualte khuaah PMKSY 2.0 chungchang leh scheme hnuaia ramngaw siam thar tura hmalakna kal zela Paulownia chìn leh enkawl dan inzirtirna an buatsaih. Khawtual mi eng emaw zat an tel a, mithiamte'n thil pawimawhte an zirtir a ni.

Chhiatrupna
hmachhawn zirtir

Mamit District Disaster Management Authority (MDDMA) chuan Mamit khawpuia VC member-te leh YMA hruaitute tan April 13, Ningani khan Training of First Responders an buatsaih a, Mamit bawrhsap VL Remliana'n a hmanpui. Health department, State Disaster Response Force (4th IR) leh Fire & Emergency Services department mite'n thil pawimawhte an zirtir a ni.

Police-in hmun hnihah
kuhva rah an man

Khawzawl police-te chuan April 13, Ningani zan khan Tualpui péngṭhuamah truck pakhat aṭangin Myanmar aṭanga dan loa lak luh kuhva rah ip 65 (kg. 5,200) leh lirthei khalhtu Lallianmawia (37), Champhai Kanan Veng nia inchhal an man. Sairang police-te pawhin April 13 vêk khan truck pakhat aṭangin kuhva rah ip 90 (kg. 7,200) an man a, lirthei khalhtu B Lalsawmliana (34), New Champhai nia inchhal an man nghal bawk. Kuhva rah an mante hi police-te chuan Customs department hnenah an hlan a ni.