Zokhawsanga AR hmun paltlang turin Loneitute'n harsatna an nei tawh rih lo; A tahtawlin Zokhawsangah AR an lut dawn
Zokhawsang leh a chhehvela loneitute tan Assam Rifles-te'n Zokhawsanga an hmun paltlang turin harsatna an siam tawh dawn rih lo nia thu dawn a ni. Hetih lai hian, AR-te chu a tahtawlin Zokhawsangah insawn luh belh zel an tum.
Vanglaini thu dawn danin, loneitu Zokhawsang paltlang turte chuan identity card - voter ID, Aadhaar card, adt. eng emaw ber an ken a ngai a; ID card chu AR checkgate-ah dahin, an haw pahin an la leh ṭhin ang. Hei hi AR-in venhimna thil atana an ruahmanna a ni.
Assam Rifles-te'n training pawimawh an neih lai leh silai an kah lai chuan Zokhawsanga an hmun hi paltlang a rem dawn lo a; hetiang thil pawimawh bik an tih dawn chuan an tih hma ni-ah an tih hun chhung tur loneitute hriattir lâwk tura ruahman a ni.
Hetih lai hian, AR-te chuan an hmun paltlanga quarry-a lung lâk an remti rih dawn lo a; a chhan chu - kawng a zím a, an lirthei lian leh lung phurtu lirthei intawha buaina a awm theih avang leh rit phur lirtheiin kawng an zawh fo chuan a chhiat belh an hlauh vang a nih thu an sawi.
Mizoram sorkarin a intiam angte a tipuitling a nih chuan Assam Rifles-te hi a tahtawlin Aizawl aṭangin Zokhawsangah insawn luh belh zel an tum a; insawn tur chungchangah Mizoram sorkar nen memorandum of understanding ziak turin ruahmanna siam mek a ni.
Assam Rifles-te hian insawn chhuah vekna atan kum hnih leh a chanve vel an mamawh dawn a, hmun ṭhenkhat chhuahsan loh an duh laite chu Mizoram sorkar hnenah an thlen.
Tarlan tawh angin, Zokhawsang leh a chhehvela huan leh lo neitute chuan an feh kawng AR-in an dan chungchanga sorkar hmalakna muang an tih avangin April 11, 2023 khan Zokhawsanga AR hotute an dawr a ni.
Zemabawk Farmer Society (ZFS) hruaitute chu Union Home minister Amit Shah a lo kal dawn avangin March 30 thleng Zokhawsanga AR ram paltlang theih a nih dawn loh thu March 24, 2023 vel khan hriattir an ni a, a hnuah April 1, 2023 thleng tih leh a ni. AR duh dan hi loneitute chuan ṭha takin an zâwm niin an sawi.
April 1 hnuah pawh an huan/loa an kal tur chu AR-in an lo dang zel a, chu an harsatna tawh chu Chief Minister hnenah an thlen. April 8 zingah khan CM hnenah thlen lehin, April 10, 2023 hma ngeia AR hmun an paltlang theihna tura hma laksak turin an ngen nawn a ni.
April 10 khan huan/lo neitute chu feh turin an kal a, mahse, AR-in an lo dang leh a ni. ZFS hruaitute chuan Zokhawsanga AR hotu hnenah lehkha thehlutin, an huan/lo panna kawng dang siamṭhat a nih hma chuan AR ram chhunga kaltlang phal turin an ngen.
ZFS hruaitute chuan, Zokhawsanga AR hmun paltlang lo chuan an huan/lo kal a harsat thu sawiin, "A hêlna kawng a chhe hle a, thlai kan lâk pawhin in kan thlenpui chuan a chhe hman a ni," an ti a; kawng chu siamṭhat a nih hma chuan AR hmun paltlanga feh an duh thu an sawi a ni.