Mizoram police-te'n kumin chhungin kuhva rah kg. 5,44,030 an man tawh

Mizoram Police chuan kumin January 1 aṭanga April 10, 2023 thleng khan Myanmar aṭanga dan loa lâk luh nia hriat kuhva rah ip 7,435 (kg. 5,44,030) an man.

Police thuchhuah chuan, dan loa kuhva rah phurh titàwp vek turin Mizoram Police-in theihtawp an chhuah zel dawn tih an tarlang a, "Dan bawhchhiatna chi hrang hrang donaa beihpui kan thlâknaah hian mipui thlàwpna kan ngen nawn leh a ni," an ti.

Dan loa kuhva rah phur hriate chu mahni kuta dan kenkawh tum mai lo tur leh police leh thuneitute hrilh vat zel turin mipui a chah bawk.

Police thuchhuah tarlan danin, kumin January 1 aṭanga April 10 inkarah khan Mizoram police-te chuan dan loa phurh kuhva rah ip 7,435 an man a, a vaiin cheng nuai 3,172 chuang man a ni. Kuhva rah man zinga ip 2,321 chu Aizawl district-a man niin, man tamna ber district a ni a, man tlemna ber district - Hnahthial district-ah ip 426 man a ni thung.

Kuhva rah man kaihhnawiah hian Indian Penal Code (IPC) Section 188 hnuaiah mi 61 lakah thubuai 19 ziah luh a ni.