Minister-in Biju Festival a hmanpui

Chakma kût ropui ber Biju chu April 13, Ningani zan khan Mamit district-a Ragiv Nagar-ah an lawm a, minister of state Robert Romawia Royte-in a hawng a, Central Young Chakma Association hnenah computer a pe nghal.

Robert Romawia Royte chuan, Chakma-ten Mizoram pum huapa a vawi khat nan Biju Festival an hmang chu a lawmpui thu a sawi a, "He kût hi kum thar puala hman a nih angin, mipuite hun thar atana duhsakna ka hlan a, Mizoram leh state dang aṭanga kût chhim tura lo kal Mizo, Chakma, Bru mipuite chu Biju hian a ṭha zawnga inkungkaihna a thlen ka beisei," a ti.

Mizorama chêng hnam tin chu Mizoram sorkarin an changkanna a duhsak vek tih sawiin Minister chuan, "Chakma chenna area-a la awm ngai lo phûl lem ṭha chi pawh Chawngte Football Ground-ah phah a ni tawh a, thil ṭha dang tam tak pawh Chakma area-ah din zel a ni," a ti a; Biju chu Tourism department-in dan angin festival recognition pek tur a ngaihtuah zingah telh tum a nih thu a sawi bawk.

Biju festival-ah hian bialtu MLA H Lalzirliana, MLA K Laldawngliana leh mi pawimawh dangte an tel a; hnam làm chi hrang hrang leh zaite entir niin, vawiinah a ṭiak ang.