Tuipui Ground Water Irrigation Project hawng

Irrigation & Water Resources minister C Lalrinsanga chuan nimin khan Champhai leileta Mualbuhvum hmunah lei chhunga tui verh chhuahna, Tuipui (Mualbuhvum) Ground Water Irrigation Project (GWIP) a hawng. GWIP hi PMKSY-Har Khet Ko Pani aṭanga hmuh cheng nuai 99.10 hmangin siam a ni.

Mizoramah chuan irrigation (tui lak) atan lei chhung rila tui (ground water) hman a la ni meuh lo a, Mizoram hmun hrang hrangah Groundwater Irrigation project 13 kalpui mek a ni. Hengah hian senso aṭanga 90% chu sorkar laipuia Ministry of Jal Shakti hnuaia Department of Water Resources RDGD-in a tum a, 10% chu Mizoram sorkar tum tur a ni thung.

Project 13 thawhna atan cheng nuai 1,604.89 ruahhman a ni a, project pali zawh tawh niin, Tuipui Ground Water Irrigation Project hi project 13 zinga hawn hmasak ber a ni.

C Lalrinsanga chuan, Mizoramah ground water irrigation project kalpui dan turte uluk taka zir chian hmasak ṭhin a nih thu a sawi a, "Tlang ram leh phaizawl dinhmun a inchen loh avangin ngaihtuahna sèn ngun bik a ngai. Hmarchhakah lei hnuai tui chîm chin, ground water table a ṭhat avangin hmalakna awm chhunte a hlawhtling deuh zel," a ti.

Lei chhungrila tui verh chhuah chu sorkar hriatpui loa kalpui ngawt theih a nih loh thu sawiin Minister chuan, "Dan duan mek a ni. Ruahtui van tla, a sûr dan, leilunga hîp luh leh luan ral dan te, boruak hnàwn dan leh thli kal dan te, ni sat dan leh lui tui luang zatte zirchianna, National Hydrology Project Real Time Data Acquisition System chu Mizoram hmun 53-ah bun a ni a, a dang paruk bun leh mek a ni," a ti a, RTDAS chuan tui neih dan leh hman ṭangkai dan tur thlengin a pui thei dawn niin a sawi.

Pradhan Mantri Kisan Urja Suraksha evam Utthan Mahabhiyan (PM KUSUM) kaltlangin hmun hniam zawk aṭanga hmun sang zawka ni zung chakna hmanga tui pump chhuahna, solar water pump kalpui tura hmalak mek a nih thute Minister chuan a sawi bawk.

Sorkar thuchhuah tarlan danin, India ram hi khawvela lei chhung rila tui tling hmang nasa ber a ni a; ground water hman nasatna ber chu irrigation sector niin, ground water hman zawng zawng aṭanga 89% a tling.

Groundwater Irrigation project-in a tum ber chu - loneitute'n an huan/lo/ram enkawlnaah kumtluana tui hnianghnâr an hmuh theih nana lei chhung rila tui verh chhuah leh sem kual a ni.

Tuipui (Mualbuhvum) Ground Water Irrigation Project hawnna hi IWR chief engineer Lalrotluanga'n a kaihruai a, bialtu MLA ZR Thiamsanga pawhin thu a sawi.