ADMACS-in Aizawl Press Club-ah General Asembly an hmang

Mizorama primary agriculture credit society (PACS) zinga mi, Aizawl District Agriculture Credit & Marketing Cooperative Society Limited (ADMACS) chuan nimin khan Aizawl Press Club-ah Annual General Asembly an hmang.

Kum 2023-2028 chhung atan hruaitu thlanna an neih bakah Annual Report leh Cash Account report te ngaihthlak a ni, heng report te hi sawiho a nih hnuah Assembly palai te chuan lungrual takin an pawm a ni.

ADMACS Secretary tarlan danin, ADMACS hi kum 1982-ah Registrar Cooperative Society-ah ziah luh a ni a, share holder mi 68 an awm mek. Thawktu - voluntary general manager pakhat, manager pakhat leh collector 10 an awm a, office pahnih an nei. Tachhip ramah buh ṭin 3-4 hmun ram neiin, agriculture, piggery leh poultry project-te kalpui an tum mek.

ADMACS hian 2019 aṭangin credit institution kalpui tura a ruahman chu Covid-19 avangin kum 2021-ah an kalpui ṭan thei chauh a, thla riat chhungin Rs 1,86,51,521 an la lut hman. Chhungkaw 84 hnenah eizawnna bul ṭanna atan loan cheng nuai 70 chuang pe chhuak tawh a, loan an pek chhuah aṭangin cheng nuai 20 chuang an hmu let tawh a ni.

Nimina an inkhawmpuiah hian kum 2023-2028 chhunga hruaitu tur an thlang a; chairman atan LT Sanga, Mission Veng, vice chairman atan K Liankhuma, Zemabawk leh treasurer atan Zodinpuii, Falkland Veng te an thlang.