BAO huam chin hmun hnihah ṭhen

Mizoram sorkar chuan East Lungdara Block Agriculture Officer (BAO) huam chin chu hmun hnihah a ṭhen a, East Lungdar leh North Vanlaiphaiah BAO pisa a awm dawn.

East Lungdar BAO huam chin ṭhen a nih chungchangah hian Agriculture secretary J Hmingthanmawia chuan April 12, 2023 khan hriattirna (notification) a tichhuak a ni. East Lungdar BAO hnuaiah East Lungdar, Léng, Sailulâk, North Mualchéng, Khawlailung leh Pilêr khuate a awm dawn a; North Vanlaiphai BAO hnuaiah North Vanlaiphai, Lungkawlh, Lungchhuan, Sialsír, Bâwktlang leh Chekawn khuate an awm dawn a ni.

Tarlan tawh ṭhin angin, Mizoram sorkarin N Vanlaiphai BAO pisa chu E Lungdarah a sawn avangin N Vanlaiphai khawtlang mipuite chuan kawng hrang hrangin lungawi lohna an lo lantir tawh a ni.

N Vanlaiphaiah kawng zawh leh total bandh an huaihawt tawh a, VC hrang hranga MNF member-te'n bànna an thehluh bakah MNF unit pasariha hruaitute'n seal thehlutin bânna an thehlut tawh a; April 10-15, 2023 chhungin sorkar pisa kái turte dan tumin ruahmanna an siam bawk.