Leilung mil policy ṭha neih a ngai - MYC Chairman
Nimin khan Hnahthial College auditorium-ah 'Consultation & Workshop on Skill Development Framework: Hnahthial District’ buatsaih a ni a, Mizoram Youth Commission chairman Dr Vanlalṭanpuia, MLA-in hmanpuiin, ramin hma a sawn dawn chuan a mamawh leilung mil policy neih ṭhat a ngaih thu a sawi.
Zirhona hi Hnahthial College principal K Lalsangluaia'n a kaihruai a; Dr Vanlalṭanpuia chuan, mihring thiamna leh theihna tihhmasawn (human resource development) lamah Mizote'n ṭan an lâk a ṭul thu sawiin, "Zo fate hian thiamna leh theihna kan nei ṭha a, eng kawng pawh zawh ila, kan ti thei mai zel," a ti.
Dr Vanlalṭanpuia chuan, zirlai lehkhathiam leh nunchang ṭha tak tak an tam tawh a, chutih rualin, hna thawh tur an nei si lo chu an harsatna a nih thu sawiin, "Chumi tihrehna ṭha ber chu skill development kalpui a ni. Mizo nula leh tlangval, ram páwna hnathawkte avangin Mizoramah thla tin cheng nuai 400 vel a lut ṭhin," a ti a; thil tê tak têa ngaihte pawh mamawh tak a nih theih thu a sawi.
MYC Chairman chuan, Mizorama hnam dang awmte an haw a, ramin cement mistiri a mamawhzia a lang tih sawiin, "Kan ṭhalai fel tak takte hian thawh hreh nei loin kan ram mamawh hi an hmuh thiam a ngai tak zet. Hmasawnna dik chu a hniam aṭangin a sangah a kal ṭhin a ni," a ti.
Workshop-ah hian agriculture leh a kaihhnawih te, industry leh services chungchangte mithiam hrang hrangin an sawi a, zirho a ni. Skill Development Framework: Hnahthial District-ah hian member pakua awmna Core Team din a ni a, chairman chu DC a ni.