Minister-in a bialah lungphùm a phúm

Minister of state Robert Romawia Royte chuan nimin zing khan a bial Aizawl East-II constituency chhunga Chite, Chhinga Veng, Chhinga Vengthar leh Dawrpuia hmasawnna ruhrel din thar tur lungphùm a phúm a, sak zawh tawh a hawng bawk.

Robert Romawia Royte hian Chite vengah Health Clinic Centre a hawng a; clinic atana in thar sak dan tur hmunhma thlithlai mek a nih thu leh khawtlang hruaitute nen inráwn chunga sak thuai a beiseiawm thu a sawi. Sports Minister chuan KVM High School, Chhinga Vengah basketball court siam thar a hawng. Basketball court hi MLA LADS fund Rs. 8,00,000 hmanga siam a ni a, ­Chhinga Veng Local Council-in a siam hna an thawk. KVM H/S chhung­a awm ni mah se, khawtlang tana chhawr ṭangkai theih tura ruahman a ni.

Minister hian Saron Veng kaltlanga Chhinga Vengthar leh Tuithiang inkalpawhna tur lei 'Lalat Bridge' tia a hming vuah bul ṭanna turin lungphùm a phúm. Lei dawh a nih theih nan mi pathumin an ram a thlàwnin an pe a, Lalat Enterprise neitu PC Lianhrima'n a ram zau tak a thláwna a pek avangin lei hmingah pawh Lalat Bridge tia vuah a ni a; a dawh nan leh kawng sial nan cheng nuai 200 ruahman a ni.

Robert Romawia Roy­te chuan Dawrpui Mul­­tipurpose Centre-a Mul­ti-level Parking cum Bas­ketball Court sakna tur lungphùm a phúm bawk.