Panchayati raj-ah ram pum huapin Ngopa-in lawmman pakhatna an dawng

India rama gram panchayat (village council) 2 55,000 vel zinga hna thawk ṭha thlanah Ngopa VC telin, Nanaji Deshmukh Sarvottam Panchayat Satat Vikas Puraskar (NDSPSVP) lawmman pakhatna an dawng a; nimin khan New Delhi-a Vigyan Bhawan-ah President Droupadi Murmu-i'n lawmman a hlàn.

NDSPSVP hi Sustainable Development Goals 17 tihhlawhtinna tura Localization of Sustainable Development Goals (LSDGs) theme hrang hrang pakuaa ti ṭhate lawmman a ni a; Ngopa khuain lawmman an dawn hian thuchei leh Rs 1,50,00,000 a keng.

LSDGs theme-te chu Poverty Free & Enhanced Livelihood, Healthy Pancha­yat,Child Friendly Panchayat, Water Sufficient Panchayat, Clean and Green Panchayat, Self Sufficient Infrastructure, Socially Secured Panchayat, Panchayat with Good Governance lehWomen Friendly Panchayat-te an ni.

Nimina lawmman hlannaah hian Ngopa VC president K Lalremmawia'n President Droupadi Murmu hnen aṭangin lawmman a dawng a, Local Administration Department (LAD) director Rita Pachuau leh department official dangte'n an ṭawiawm a ni.

Ngopa khuain lawmman an dawn chungchangah hian LAD minister K Lalrin­liana chuan lawmpuina thu a tichhuak a, "Mizoram mai ni lo, India ram pumpuia VC 2,50,000 chuang zinga tehfung hrang hranga teh hnua VC ṭha ber an ni thei hi Mizoramin a chhuang tak zet. India rama state kilkhawr ber, panchayati raj institution hman ve lohnaah Ngopa khawtlang mipui inlungrual leh thawkrim, khawtlang hruaitu ṭha leh a ngaihna hria an awm hi India ram puma Mizoram hmél lanna, kan mawina a ni," a ti.

LAD Minister chuan, Ngopa khawtlang hruaitute leh mipui te, Saitual district-a sorkar hnathawkte leh LAD hnuaia thawktute zawng zawng thawhrimna a chhuan thu a sawi a; Ngopa khaw hlawhtlinna chu khaw dang tan phûrna petu a nih thu a sawi bawk.