Politics-a awmte an dik a ṭul - Lalsawta

Mizoram Pradesh Congress Committee (MPCC) chuan nimin khan local council by-election neihna tur Dur­tlang Leitanah vantlang inkhawm an buatsaih a, an president Lalsawta chuan, politics-a awmte an dik a ṭul thu a sawi.

Lalsawta chuan, politics-a mi awm chhan chu hmingthanna, hau­sakna, nawmsak leh lal duh vang a nih chuan ram kaihhruaina tura thil hlauhawm a nih avangin paih vek tur a nih thu a sawi a, "Politics-a kan awm chhan a dik a ṭul. Politics hi mi tlemtê tana hausak leh khawsak nawm nan a ni lo, mi zawng zawng tan a ni tur a ni. He ram hian mi tak tak, hmangaih taka enkawltu a mamawh tak zet," a ti.

Leiah Pathian lal ram dina thlentir turin Isua'n mihringte a zirtir tih sawiin Lalsawta chuan, "Chutiang tur chuan kan ṭawngṭai ṭhin. Chu chu a taka thlentir turin ṭhat loh theih lohna báwm, system dik hi kan zuar a ni," a ti a; mipuite bum tlak an ni tawh lo a, khai chhuah tlak an nih thu a sawi.

MPCC President chuan, kawng dikah mipui hruai an duh tih sawiin, "Ṭang puihna hmangin mi rethei zawkte dam khawchhuahna kan siamsak dawn. Mizoram hi mi taimate tamna ramah siam hi kan thei. Dinhmunin a zir loh avanga mahni in leh lo leh bungrua hralh ngai khawpa manganga awmte tan Congress party-in chhanchhuahna beihpui kan thlák dawn a ni," a ti.

Congress MLA Lalrindika Ralte pawhin thu sawiin, tun hma chuan mi dik lo leh mi ṭha lote khawtlangah an kimki ṭhin tih a sawi a, "Tunah chuan mi dik lo leh pawisak nei lote an zak tawh lo a, an kimki tawh lo," a ti a; Mizoramah mi duhâm leh mahni hmasialte'n ram rorelna an luah nan hmalak a ṭul thu a sawi bawk.