MNF leh Zoramthanga do loin, hnam thuthlung an do - Zorama

MNF president Zoramthanga chuan, anmahni beitute chu an do hre loah a puh a, MNF leh Zoramthanga do loin, hnam thuthlung an do zawk a, do hneh chi a ni lo niin a sawi.

MNF thuchhuah tarlan danin, nimina Mizo Hnam Rûna inkhawmah Zoramthanga'n thu a sawi a, "Vawiina min beitute hian an do an hre lo. Hmâna thubuai hluite kha an thukphûm lum leh a. Zoramthanga hi tichhe vek mahse hnam thuthlung chu a ral lo ang. An doa hi Pathian leh kan ram tan tih thuthlung vuan tlattu a ni. A mihringte hi fel tak kan ni lo, mahse, ram leh hnam tana bei tlattu leh thuthlung vuan tlattu kan nihna hi kan felnaa pawm a ni," a ti.

Zoramthanga chuan, "MNF an do lo, Zoramthanga an do lo. Pathianin chanchin ṭha hril hna thawk tura he hnam a buatsaihna thuthlung an do a ni zawk. India sorkar leh sipai general-te pawhin an do hneh loh thuthlung meichher hi do hneh chi a ni lo," a ti bawk. 

MNF President chuan, kum 1966-a rambuai kha pumpelh theih ni mah se, Pathianin thisena baptist a duh nia sawiin, "Underground leh overground bakah, Zoram chhung leh páwna mite'n kan tuar vek. Hei hi hnam thuthlung tihnghehna a ni. Chanchin ṭha hril tura min buatsaihna a ni," a ti a; party dangte kum eng emaw hnuah an ral laiin, MNF chu kum 62 a kal tawh a, a vul zel niin a sawi.

Zoramthanga chuan, Mizote chu Pathian remruat dana India-a lut an nia sawiin, "Burma zawm emaw, Pakistan, India, crown colony zawm emaw, independence boruak karah political vacuum a lo awm a, India ramah kan lo awm ta mai a ni," a ti.

Nimina Mizo Hnam Rûna inkhawmah hian Zoramthanga hian MNF zawm thar mi 181 a lawm lut niin MNF thuchhuah chuan a tarlang.