ZPM-in Zemabawkah campaign khâr

Naktuk April 19-a Zemabawk Local Council by-election neih turah nimin tlai khan campaign hun a tawp avangin ZPM party chuan nimin chaw­hnu khan Zemabawk bazarah campaign khârna inkhawm an buatsaih a; ZPM working president K Sapdanga'n mi 472 a lawm lut niin an tarlang.

Inkhawm hi ZPM Gen.Hqrs aṭanga Observation Team chairman C Lian­lunga'n a kaihruai a; ZPM PAC member TBC Lalvenchhunga, Vanlal­sailova leh Jeje Lalpekhlua ten thu an sawi.

TBC Lalvenchhunga chuan, party-in mipui tana ruahmanna an siam leh hmachhawp lam ni lo, party dang sawichhe zawnga campaign chu a changkang tawh lo tih sawiin, "Keini chuan mipuite'n an chanvo dik tak engtin nge an chan ang a, kalphung thar hnuaiah hmasawnna engtin nge kan neih theih ang tih hi kan auhla a ni," a ti a; an tana hnathawh kawr ha tur uluk taka thlang turin Zemabawk mipui a ngen.

April 19-a Zemabawk LC by-election neih turah hian member zawng zawng thlan tur a ni a; April 19 vêk hian Durtlang Leitan leh ITI Vengah LC member pakhat ve ve thlangin by-election neih tur a ni bawk.