Child Tracking Software tlangzarh

Mamit DC Dr Lalrozama chuan nimin khan zirna lama Mamit district hmasawnna tur 'Child Tracking Software' a tlangzarh a, sikul hrang hranga hman tur water filter leh tuizem eng emaw zat a vailiam bawk. Heng thilte hi Rural Electrification Corporation Limited (REC)-in corporate social responsibilty (CSR) aṭanga an pek a ni.

Dr Lalrozama chuan, Mamit district chu India rama district hmasawn ngai zual zinga chhiar a nih angin, tehfung hrang hrang 49 hmangin thla tin teh ṭhin a nih thu a sawi a; hmasawnna hna thawhnaah ṭhahnemngai tak leh Mamit district-in hmél thar a hmuh ngei theih nan thawk turin a chah.

Mamit district hi NITI Aayog hmalakna sorkar laipui hnuaia public sector undertaking (PSU)-te aṭangin CSR hmanga ṭanpui tura tih a ni a; chumi ang chuan education sector-a hma an sawn theih nan cheng nuai 879-a an ṭanpuina tur Memorundum of Agreement (MoA) ziah a ni tawh.

Hmasawnna hna thawhna tura inremna zing­ah sikul tina tui thiang­hlim in tur hniang­hnar dah te, learning outcome tih te, transition from primary to upper school tih te, transition from upper primary school to secondary tihte a awm. Sikul 144-ah tuizem (water tank) dah tum a ni a, sikul 245-ah tui tihthianghlimna (water filter) dah tum a ni bawk. Tuizem lei nan cheng nuai 20.16 leh filter lei nan nuai 8.57 ruahman a ni.

REC-in CSR hmanga hma an laknaah hian Child Tracking Software kalpui tur a ni a; project-in a tum ber chu - zirlai naupang zawng zawng an sikul kalna leh insawnnate awlsam taka chhui theihna turin Child Tracking Software siam tur tur niin, cheng nuai 10 ruahman a ni. Software hmangin block resource centre (BRC) tinah zirlaite chanchin web portal hmanga dah tur a ni.