May 9, 2023-ah CADC inthlang dawn

18th April, 2023

State Election Commission (SEC) chuan Chakma Autonomous District Council (CADC) inthlanpui neih hun tur nimin khan a puang a, May 9, 2023-ah vote thlâk a ni dawn. CADC huam chhungah Model Code of Conduct hman nghal a ni.

SEC tarlan danin, CADC Member of District Council (MDC) General Election neih turah hian April 24, 2023 thleng nomination paper thehluh theih a ni dawn a; nomination paper-te chu April 25 tlaiah endik tur niin, inhnûkdâwk duh tan April 27 chhun dar 12 thleng hun hawn a ni ang.

May 9, 2023-ah vote thlak a ni dawn a, zing dar 7 aṭanga tlai dar 5 thleng vote thlak hun hawn a ni ang. Inthlan ṭhat ngaihna a awm chuan May 10-ah vote thlak ṭhat a ni ang a, May 11-ah vote chhiar tura ruahman a ni.

Inthlana returning officer tur chu Lawngtlai DC a ni a, additional DC chu assistant district election officer niin, Chawngte SDO (Civil) chu assistant returning officer atan ruat a ni. Vote thlakna atan electronic voting machine (EVM) hman a ni ang.

CADC MDC ni mekte term hi May 4, 2023-ah a tàwp dawn a, term a tawp hnuah inthlan buatsaih a ni dawn a ni. Hetih lai hian, CADC sorkar hi dan pangngaiin a kal lo a, Governor-in a enkawl mek nia thu dawn a ni.

SEC chuan MADC huam chhungah Model Code of Conduct a puang nghal a; MCC hian political party, candidate te, minister te, MLA te, MDC-te leh Council inthlannaa inhnamhnawih public servant-te a huam tih
a tarlang.

Inthlanna him, felfai leh muanawm a awm theih nan inthlanna buaipuitu, political party, media, pawl leh mipui ṭawiawmna SEC chuan a ngen a, "Mipui duh thlanna kaltlanga tualchhung inrêlbàwlna ṭha tak kan neih theih nan theihtawp chhuah ṭheuh turin mi tinte SEC chuan a sáwm a, vote nei zawng zawngte chu vote thlak ṭheuh turin a sawm a ni," a ti.

CADC MDC BIALTE
Bial hming
1. Borapansury-I
2. Borapansury-II
3. Chhotapansury
4. Bajeisora
5. Kamalanagar North
6. Kamalanagar South
7. Kamalanagar West
8. Udalthana
9. Ugudasury South
10. Mondirasora
11. Ajasora
12. Maniabapsora
13. Vaseitlang
14. Longpuinghat
15. Rengkashya
16. Damdep
17. Jaruldubasora
18. Fultuli
19. Devasora South
20. Parva