US sorkar palaiin Mizoram a tlawh
Kolkata-a US consul general Melinda Pavek leh a thawhpuite chuan Mizoram an rawn tlawh. April 16, Pathianni tlai khan Central YMA office tlawhin, CYMA hruaitute nen an inkâwm a, nimin khan Aizawl West College-a Alora - Center for Well-Being leh Mizoram University an tlawh bawk.
US Consulate, Kolkata aṭanga Mizoram rawn tlawhtute hi Melinda Pavek bakah, control officer Sonia Laul, political specialist Tinku Roy, security specialist Abhijit Sharma leh press and media manager Jay Rota Das te an ni a; Pathianni tlai khan CYMA office tlawhin, CYMA vice president Lalhmachhuana, general secretary Prof. Lalnuntluanga, assistant secretary Prof. Malsawmliana leh CEC member ṭhenkhatte'n an lo dawngsawng a ni.
Inkawmhona hi CYMA Vice President-in a kaihruai a, General Secretary-in YMA hnathawh leh hmalaknate a hrilhfiah a ni.
Melinda Pavek chuan, YMA inkaihhruaina leh an hnathawh dan chu ropui a tih thu sawiin, Mizo ṭhalaite leh US ṭhalaite kawng hrang hranga thawhho dan tur a ngaihtuah tur thu leh, ei leh bâr zawnnaah inzirtirna ṭha neih a ngaih pawimawh thu a sawi a; India mite tana US mission hrang hranga tel theih dante a sawifiah.
CYMA hruaitute chuan, kumin October 24-26 chhunga Biatea YMA General Conference neih turah tel ve turin US sorkar aiawh hi an sáwm a, Melinda Pavek chuan a hman phawt chuan US ṭhalaite nen tel a duh thu a sawi.
US Consul General hian nimin khan Aizawl West College-a Alora - Center for Well-Being a tlawh a, Aizawl West College principal Prof. C Lalthlengliana, thawktu dangte leh zirlaite'n an lo dawngsawng.
Alora Center hi Aizawl West College leh SHALOM Society-in an din a ni a, PEPFAR, USA aṭanga ṭanpuina sum hmuh hmanga tleirawl zinga hmalakna tura ruahman a ni. Center hi college zirlaite bakah, a bul hnaia ṭhalaite hman ṭangkai theih tura ruahman a ni a, counseling leh health service-te pek a ni.
US palai hian nimin khan Mizoram University tlawhin, MZU hotute'n an lo dawngsawng a; zirlai hruaitu te, research scholar leh department tin aiawh zirlaite nen an inkâwm.
Melinda Pavek chuan, India leh US inlaichinnate sawiin, zirlaite'n US visa an neih theih dan turte a kawhhmuh a, India leh US-a zirlaite thawhhona chu an ngaih pawimawh ber zinga mi a nih thu a sawi. US palai hian MZU Incubation Center leh BIONEST Center-te a tlawh a ni.