Sikul naupang tam takin zirlaibu an la dawng thei lo - AAP CYSS

Aam Admi Party (AAP) Mizoram hnuaia zirlai pawl Chhatra Yuva Sangharsh Samiti (CYSS)-te chuan, April 5, 2023-ah sikul luh ṭan a nih laiin, sikul naupang tam takin zirlaibu an la dawng thei lo niin an sawi.

CYSS hruaitute hian nimin khan Aizawl Press Club-ah thuthar thehdarh­tute an kawm a; an coordinator Vanlal­thlamuanpuia chuan, "Heti taka sorkarin zirna an ngaihsak lo hi ṭha lo kan ti hle. Mizorama zirnain hma a sawn theihna atan theihtawp kan chhuah zel dawn," a ti.

Vanlalthlamuanpuia chuan, kum 2023-24 academic session chu April 5, 2023 khan ṭan a ni tawh tih sawiin, "Vawiin thleng hian sorkar sikul naupang tam takin zirlaibu an la dawng lo. Zirlaibu ṭhenkhat hi bazarah lei tur pawh a awm lo," a ti a, zirlaibu ṭhenkhat phei chu press-ah an la print mek chauh niin a sawi.

CYSS hruaitute chuan, sorkarin nau­pangte zir tur lehkhabu leh mamawh a peih hmain sikul ṭan hun a siam hmasa zawk niin an sawi a, "Hei hian zirlaite leh zirna a ngaihsak tak tak lohzia leh kan hmakhua an ngaihtuah lohzia a tilang chiang hle," an ti.

CYSS hruaitute sawi danin, kum kal ta pawh khan zirlaite'n harsatna an tâwk tawh a, sikul ṭhenkhatah phei chuan zirtirtu ṭhahnemngaite'n zirlaibu la khawmin an sem a ni.