KHAWTHLIR

Thisen pe

Catholic Ṭhalai Pawl, Kolasib chuan nimin khan Kolasib District Hospital-ah thisen unit 14 an pe a, petute mipa 10 leh hmeichhia pali an ni.

LC by-election

Naktuk April 19 hian Zemabawk, Durtlang Leitan leh ITI Vengahte local council by-election neih a ni dawn a, nimin tlai khan campaign theih hun a tàwp. Member pasarih awmna Zemabawk LC by-election-ah hian member zawng zawng thlan tur a ni a; Durtlang Leitan leh ITI Vengah chuan LC member pakhat ve ve thlan tur a ni thung.

Kângmei inzirtir

Champhai Fire Station chuan Fire Service Week 2023 hmanna kal zelah nimin khan Champhai High School-ah kângmei laka invenna leh a kaihhnawih thilte inzirtirna an buatsaih. Zirlaite chu rîkrum thil leh kângmei a chhuah palha chêt dan tur te, kâng ṭhelhna hmanraw hrang hrang hman dan te, hliam sâwngbàwl dan leh chhanchhuah hna thawh dante an zirtir a ni.

SHG variety store

Lunglei district bawrhsap Ramdinliani chuan nimin khan Lunglei Venglaiah women's self help group variety store (gram dukaan) a hawng. SHG Variety Store hi NABARD leh World Vision India ṭangkawpte'n thingtlanga miretheite dâwmkânna atana an hmalaknaa din a ni.

Forensic sawiho

Mizoram Forensic Science Laboratory leh National Forensic Science University (NFSU) hotute chu nimin khan FSL conference hall-ah an ṭhukhawm a; NFSU-a lecture pek, NFSU zirna atana hman ṭangkaia zirlaite tirh, FSL-a internship ti tura NFSU zirlaite tirh leh research work-a thawhhona turte an sawiho. NFSU aiawh hian coordinator Dr Biswajit Dey leh Dr Joy Chandra Singh, OSD-te an rawn kal a ni.

Ráltlân tanpuina

Central YMA chuan Myanmar leh Bangladesh aṭanga Mizorama ráltlânte ṭanpuina atan Rs 3,24,000 pek chhuah an rél. CYMA hian Bangladesh ráltlânte tan YMA, Tuichawng Group hnenah Rs 3,00,000 leh Myanmar aṭanga ráltlânte tan Tuipuiral Group hnenah Rs 24,000 pek an rel a ni.