NH siamnaa hnathawh dan dik lo dodal turin Mizo mipui an sáwm

Centre for Environment and Social Justice (CESJ) chuan thuchhuah siamin, NHIDCL leh an hnuaia contractor-te chu Mizorama kawngpui an siamnaah environment dan leh hrai zawm miah lo leh ram leilung fate zahna nei miah loin an chê nia sawiin, an dem thu an tarlang a; NHIDCL hnathawh dan dik lo dodal turin Mizo mipui an sáwm.

CESJ hruaitute chuan April 15, 2023 khan Thingsul Tlangnuam leh Keifangah NHIDCL lei laih vûngin Tuirinni leh Kaihzawl lui/Zawlzaua leilet bakah, lo leh nûl a tihchhiat te, Keifanga sangha dil eng emaw zat a tihchhiatte chu a hmunah an enfiah a; leilet, sangha dil leh nûl neitu chhungkaw 46 an kâwm a ni.

April 15 vêk khan Thingsulthliaha NHIDCL pisa, Toursit Lodge-ah General Manager (Project) an hmu nghal a, NH-06 (Seling-Champhai) kawng siamah kawng thlangah leivûng an nawr liam nasat thu leh chu chuan lui kam ram ṭhaa loneitute tan harsatna a siam nasat thu an hrilh bawk.

Kawng laihna leivûng paih vanga leilet, sangha dil leh nûl neitu eng emaw zatin harsatna an tawh dan chu NHIDCL leh CALA hnenah an thlen tawh tih sawiin CESJ chuan, "Vawiin thlengin ngaih pawimawh an hlawh lo," an ti a; leivûng paihin eizawnna a tihchhiat, zangnadawmna hmu si lote chu theihtawpa puih an tum thu an tarlang.

CESJ chuan, February 16, 2023-a RTI Act tlawhchhana muck disposal plan copy an dil chu NHIDCL website-a DPR-ah a awm thua chhàn a ni tih sawiin, "DPR hi NHIDCL Technical Engineer-te nen pawh enhoin muck disposal plan hmuh a ni lo," an ti.

Information dik lo an pek chhan leh muck disposal plan awm loa hna an thawh chhan an zawhna chu NHIDCL General Manager-in a chhàn pial zel thu sawiin, "Pehhêlna phêt a zawn avangin CESJ General Secretary-in thinrima office dawhkan a chum phah hial a ngai hi pawi kan ti a, Mizo mipui hriatthiamna kan dil a ni," tiin an tarlang.

CESJ chuan, "NHIDCL hian Mizorama NH siam leh laih hna an thawh zawng zawngah environment dan leh hrai zâwm miah loa ram leilung fate zahna chhetê mah nei loa an tihsual thup an tum leh dik taka thil an tih duh loh avanga loneitute thlenga an tuar zel hi kan demin pawi kan ti tak zet," an ti a; NHIDCL hnathawh dan chu Mizoram leilung, sik leh sáin nasa taka a tawrh mek lai leh a tawrh zel dawn avangin dodal turin Mizo mipui an sáwm a ni.