Police-te'n kuhva rah an man

Chhingchhip Police Outpost-a duty police-te chuan April 15, Inrinni zan khan Hmunṭha kawng, Tuikum bulah lirthei panga aṭangin Myanmar aṭanga dan loa lâk luh nia hriat kuhva rah ip 180 (kg. 12,600 vel) an man.

Kuhva rah manna lirthei panga khalhtute chu, Champhai Ruantlang mi pali - Laltlanchhuaha (29), Lalrokima (42), Lalṭhazuala leh Joel Lalrinsanga bakah, Rothanmawia (26), Champhai Zotlang nia inchhálte an ni a; kuhva rahte chu Champhai Zotlang aṭanga an phurh, Khawzawl - Rabung - Kawlkulh - Chhawrtui - Maite - Hmunṭha kaltlanga Aizawla phurh luh tum a ni tih Police thuchhuahin a tarlang.

Inrinni vek khan Kulikawn Police Station-a police-te chuan Melthum daia Silai Mualah Tata Yodha 207 aṭangin Myanmar aṭanga dan loa lâk luh nia hriat kuhva rah ip 40 (kg. 3,200 vel) an man a; lirthei khalhtu H Laltluanga (37) s/o H Ngiandova, Leisenzo, Champhai district nia insawi an man bawk.

Kuhva rah mante hi Customs department hnenah hlan a ni.