May 2023-ah healthcare sum pek beisei

MNF adviser leh Health minister Dr R Lalthangliana chuan, health care scheme-a damlote pawisa sorkarin a bat rulhna turin kum 2023-24 budget-a healthcare atana sum dah vbc. 60 zinga eng emaw zat chu thla thar, May 2023-ah pek beisei a nih thu a sawi.

MNF thuchhuah tarlan danin, Dr R Lalthangliana hian nimin khan Mizo Hnam Rûna inkhawmah thu a sawi a, "Health care pawisa cheng vbc. 70 vel kan bá pawh thla tharah chuan budget-a cheng vbc. 60 kan dah aṭangin eng emaw zat bill kan release ka beisei. ADB project kan tihfel chuan health care bill táng a awm tawh dawn lo a ni," a ti.

Party ṭhenkhatin felfai em emin sorkar din an tum nia sawiin R Lalthangliana chuan, "Hei hi a theih loh. Keini chuan kan fel loh ang angin mi rethei kilkhawr ber thlengin, zu leh drugs-in a tihbuaite pawh kan enkawl zel ang. Zai thiam chu nasa takin zai mai se, chutiang bawkin inkhel thiam pawh," a ti a, vawi khat pawh minister la ni lo tan CM nih tum ngawt chi a ni lo niin a sawi.

MNF Adviser chuan, social media politics buaithlak a tih thu sawiin, "Sorkar thil tih a chhe lai pho chhuak a, mipui ngaihdan tichîrî zawnga thil tih hi tun hmain a awm ngai lo. Belhchian dâwl si loa sorkar tuma sorkar beihna hi thil ṭha lo tak a ni," a ti.

Dr R Lalthangliana hian department a enkawl Health & Family Welfare-a hmasawnnate a sawi lang a; Covid-19 lêng vanga harsatna an tawhte a sawi bawk.