Champhaiah SEDP sem dan tur sawiho a ni

Champhai District Committee on Socio Economic Development Programme (SEDP) chu nimin khan an chairman James Lalrinchhana, district bawrhsap hoin DC conference hall-ah an ṭhu a, SEDP ṭanpuina sem dan tur an sawiho.

Ṭhutkhawmah hian village level committee-te tan SEDP thawh hnihna kalpui ṭan hmain training buatsaih an rêl a, VLC on SEDP siamrem dilnate an pawm. Thawh hnihna hnuaia hamṭhatna dawng thei tur rawtna thehluh hun hnunhnung atan April 30, 2023 an ruat a, VLC on SEDP-te chu hun bituk chhunga rawtna an neihte district committee hnena thehlut hman vek turin an chah.

SEDP thawh hnihnaa ṭanpuina dawng tur hian line department pariat - UDPA, Agriculture, Animal Husbandry & Veterinary, Horticulture, Sericulture, Fisheries, Commerce & Industries leh Land Resources, Soil & Water Conservation department hnuaiah Champhai district-a MLA bial pathum aṭangin chhungkaw 1,400 ṭheuh thlan a ni dawn a, a vaiin chhungkaw 4,200-in ṭanpuina an dawng dawn a ni.