TNAI hruaitute'n Mizoram an rawn tlawh

Trained Nurses Association of India (TNAI) hruaitute - president Prof. Roy K George, secretary Evelyn P Kannan leh account officer-te chuan April 15, Inrinni khan Mizoram an rawn tlawh a, TNAI, Mizoram Branch hruaitute nen an inkâwm.

India ram puma TNAI hruaitute hi TNAI, Mizoram Branch hruaitute chuan Lengpui Airport-ah lo hmuakin, Aizawl an pan pahin TNAI-in Luangmuala ram a lei tur an enpui nghal a; tlaiah Hotel Floria-ah audit neih a nih bakah, zanah TNAI, Mizoram hruaitute nen an ṭhukhawm a ni.

Ṭhutkhawm hi state SNA advisor Laldingliana Sailo-in a kaihruai a, president Lalremmawii'n thu a sawi bakah, secretary Lalrinhlui'n kum thum kal ta chhunga TNAI Mizoram hmalaknate a sawi. Prof. Roy K George leh TNAI hruaitu dangte'n thu an sawi bawk.

TNAI hi kum 1908-ah din a ni a, India ram pumah member 3,00,000 chuang an awm a, Mizoram State Branch bikah member 3,356 an awm mek. India rama TNAI president Prof. Roy K George hi thiamna lamah PhD a ni a, Baby Memorial Hospital-ah director leh Kazhikode College of Nursing-ah principal ni mek a ni.