Tut luia nghakuai inchiahsiakah mi 20 chuangin sangha an man

Fisheries department leh an thawhpuite'n ni hnih chhung, April 14-15, 2023-a Dapchhuah bul Tut luia nghakuai inchiahsiak an buatsaihah mi 2,700 chuang an tel a, mi 20 chuangin sangha an man/khai.

Mamita Fisheries officer Lalremsangpuii chuan, nghakuai inchiahsiak chu Fisheries department leh an thawhpui sorkar department, pawl leh Dapchhuah khawtlangin an buatsaih a nih thu a sawi a, "Mi 20 chuangin sangha an man a, chhuah lehte pawh an awm avang leh kan hnena rawn inhriattir kher lote an awm avangin a mantute'n an man zat kan hre thei lo," a ti.

Lalremsangpuii chuan, sangha an man zinga a tê deuhte chu chhuah leh ṭhin a nih thu sawiin, "Sanghate hian an dam chhungin vawi khat tal chi chhuah se kan duh avangin a tê deuhte chu chhuah leh ṭhin a ni," a ti a; luia sangha humhalhte chu dan hmangin man hun siama man theih a nih thu a sawi bawk.

Mamit FDO sawi danin, nghakuai inchiahsiaka tel turin mi 2,770 an inziak lut a, registration fee mi pakhatah Rs 700 lak niin, Rs 19,39,000 hmuh a ni. Sangha man lian ber hnenah lawmman Rs 10,000, pahnihna hnenah Rs 7,000 leh pathumna hnenah Rs 5,000 pek a ni.

Nghakuai inchiahsiakah hian registration ti zawng zawng, mi 2,770 chu tel vek ni ta se, mi 20 chuang chauhin sangha an man/khai avangin mi 2,750 vel chu an hlawhchham tihna a ni.